Wardacosta ta haya cutter nobo pa patruya, na comienso di 2029

ORANJESTAD - Diahuebs ultimo Defensa y Damen Workboats a firma un contrato pa construccion di tres boto nobo di patruya di tamaño mediano pa Wardacosta di Caribe Hulandes. E contrato a keda establece despues di un procedura di destaho. E cutternan nobo lo reemplasa esunnan actual den Caribe cu ta den uso pa mas di 25 aña. Ta anticipa cu e cutternan nobo lo ta operashonal na cuminsamento di 2029. E cutternan cu Defensa ta compra pa Wardacosta lo ta responsabel pa, entre otro, vigilancia, detencion y asistencia maritimo riba laman den e parti di Karibe di Reino. Esaki ta inclui tareanan di polis, control di frontera, patruyanan y operacionnan di busqueda y rescate riba laman.

BOTONAN MAS GRANDI Y MODERNO PA WARDACOSTA

E cutternan actual, Jaguar, Panter y Poema, a drenta den servicio na fin di añanan 1990. E botonan aki di Damen di e marca Stan Patrol 4100 a haci trabounan confiabel pa añanan. Sin embargo, debi na nan edad, mantencion y gastunan ta bira hopi halto. P’esey nan lo wordo reemplasa pa un generacion nobo di botonan di patruya. E cutternan nobo di e marca Stan Patrol 5009 lo ta aproximadamente 50 meter largo, loke ta haci nan mas grandi cu esunnan actual. Esaki ta importante debi na e condicionnan tin biaha extremo riba laman di Caribe.

E botonan nobo tambe lo ta equipa cu sensornan moderno, manera radar avansa y camaranan infraroho. Esaki ta permiti e tripulacion mantene un vigilansha efectivo hasta durante oranan di anochi of ora tin mala visibilidad. Esaki ta aumenta e efectividat operashonal di Wardakosta y ta fortalece su abilidat pa ehecuta su tareanan.

BOTONAN MAS GRANDI Y LIHE

Banda di e cutternan, Damen tambe ta suministra cuater boto pa intersepta. Cada cutter lo tin un di e botonan aki na bordo. Nan ta destina pa intersepta botonan di contrabanda rapido, e asina yama “go-fast”. E botonan aki hopi biaha ta wordo usa pa transporte di droga den Karibe. Tambe lo tin un boto extra pa intersepta disponibel pa rotacion di entrenamento y pa momento di mantencion. E botonan nobo aki lo ta mas grandi cu esunnan actual y p’esey nan lo mantene nan velocidad mas miho den olanan halto. Cu e yegada di e cutters y botonan di intersepta nobo, Wardacosta ta adquiriendo equiponan moderno cu ta miho adapta na su tareanan.