Huez penal nobo Eric Diepraam nombra pa Aruba

DEN HAAG – Mr. Eric Diepraam lo bira huez den caso penal cu Aruba como su lugar di trabou. Actualmente e ta traha como huez na Tribunal di Amsterdam y tambe como docente na Studiecentrum Rechtspleging, centro di estudio pa e poder hudicial y Ministerio Publico na Hulanda. Conseho di Ministro di Reino a duna su aprobacion pa e nombramento riba propuesta di secretario di estado Van Bruggen di Husticia y Seguridad. E nombramentonan di mr. Diepraam lo drenta na vigor 1 di april 2026.

PAPEL DI HOF COMUN DI HUSTICIA

E Hof Comun di Husticia di Aruba, Corsou, Sint-Maarten y di Boneiru, Sint Eustatius y Saba ta encarga cu e administracion di husticia riba e islanan. Hueznan di e Hof ta trata caso civil, caso penal y caso administrativo (incluyendo caso fiscal), tanto den prome instancia como den apelacion. Ademas, e Hof ta participa tambe den colegionan special di husticia, manera e colegio pa caso di funcionariopublico, y den colegionan encarga cu caso disciplinario. E Hof ta consisti di hueznan local y tambe hueznan cu ta wordo manda for di Hulanda pa sirbi temporalmente riba e islanan di Caribe den Reino.