Ex trahado di SSA Vrolijk, sentencia na castigo di prizon pa estafa

ORANJESTAD – E ex empleado di gobierno K. Vrolijk diabierna  a keda sentencia na 16 luna di castigo di prizon, di cual 10 ta condicional. Esey kier men cu e tin cu sinta 6 luna den prizon. Ademas pa 5 aña e no por fungi como ambtenaar di gobierno. Cu esaki, huez a mustra cu ta legalmente proba cu Vrolijk a estafa gobierno durante un aña y mei casi, pa un suma di 180 mil florin. Mirando cu e sentencia ta menos cu 1 aña cu e tin cu sinta, no a duna ordo pa detene Vrolijk mesora. Ademas, e ta for di Aruba pa basta tempo caba.  

EXIGENCIA FISCAL

E caso mes a tuma lugar dia 6 di Februari 2026 unda cu a acusa  Vrolijk di estafa di Stichting Sportsubsidie Aruba (SSA), malversacion di fondonan publico, labamento di placa y mal uso di su funcion como empleado di Gobierno. Den e periodo entre Mei 2023 y September 2024, Vrolijk a malversa mas di 180 Mil Florin di Gobierno. E placa aki a wordo entre otro pasa via cuentanan bancario di cuatro otro persona (asina yama “mulanan di placa”), pa asina yega riba cuenta di Vrolijk. Den practica e forma di traha aki ta nifica cu Vrolijk tabata paga e subsidionan na su mes, envez di a ehecuta e proyectonan pa engrandece deporte na Aruba. Fiscal ta haya cu mester duna castigo di multa di 7.720,63 florin, cual ta e suma cu ainda Vrolijk falta di paga. Ademas di esaki, Fiscal a exigi un castigo di 2 aña y 6 luna di prison pa Vrolijk y tambe cu pa un periodo di 7 aña, Vrolijk ta perde su derecho pa traha como empleado di Gobierno. Fiscal a exigi detencion inmediato di Vrolijk pasobra ta existi e riesgo cu Vrolijk lo trata di sconde pa cumpli cu e castigo.

CONFESION

Hues a bisa cu tin confesion por escrito di Vrolijk caminda el a admiti di a haci tur cos. E ta splica di a haci uso di mulanan di placa, o sea empleadonan cu el a usa nan cuenta di banco pa manda placa y despues haya e placa aki. Hues ta haya Vrolijk culpabel di: estafa SSA, como ambtenaar a malversa placa, culpabel di labamento di placa y cu Vrolijk a mal usa su funcion pa kita placa di SSA. En total 184.173 florin.

SEÑAL

Hues a bisa cu e ta tene cuenta cu ta promer biaha cu Vrolijk ta cay den man di husticia. Tambe Hues a tene cuenta cu Vrolijk a tuma retiro di Gobierno y ta haya importante cu Vrolijk a reconoce cu el a haci malo y a paga bek e placanan cu el a malversa di SSA. Tanto Vrolijk como ministerio publico tin 2 siman pa apela e sentencia.