Hobencito di 5 aña bringando pa su bida debi na posibel negligencia na creche

ORANJESTAD – Un hobencito di 5 aña ta bringando pa su bida awe nochi, caminda pa Bogota Colombia, despues cu pa motibo di aparente negligencia na un creche na San Nicolas, e la bira asina malo cu tabata teme pa su bida. Ta mustra cu na e creche, lo a lubid’e pa varios ora, mientras cu e tabata cera den un van di e compania. Diamars atardi central di Polis a wordo notifica door di AC (alarm central) di e caso serio ora cu ya e  mucha  homber di 5 aña a yega na Imsan y e no tabata reacionando.

Mesora dokter y personal na Imsan a cuminsa cu reanimacion y trahando hunto den equipo a logra haya un pulso.

Mirando e seriedad di e situacion di e mucha homber a pidi pa polis yuda habri caminda pa ambulance transporta e mucha cu maximo urgencia pa hospital.

Mesora diferente unidadnan policial di diferente districto a activa mesora conhuntamente cu unidad motorisa bou coordinacion di Central di Polis a cera diferente crusadanan importante pa habri caminda pa e ambulance por yega liher pero sigur Hospital. Dokter y personal na Hospital tabata den espera di e mucha homber pa asina brind'e prome assistencia medico.  E situacion di e  mucha homber ta critico. Awe durante dia e la wordo transporta cu air-ambulance pa Colombia. 

 E prome informe di Polis ta indica cu lo a haya e mucha homber den un vehiculo cu ta wordo uza pa transporte di mucha, di scol pa e creche cu e ta bishita. Na momento cu a haya e mucha homber e no tabata reacciona y e lo tabata tin basta  rato den e vehiculo. E caso ta den man di autoridadnan concerni pa asina investiga kico a pasa cu e mucha homber di 5 aña cu a wordo haya den un vehiculo sin reaccion.

Cuerpo Policial Aruba pidi nos comunidad pa haci un oracion pa e bida di e mucha homber tambe sosten pa e famia cu ta pasando den momentonan dificil.