Hatzmann: Polisnan Violenes y Dirksz mester bay prizon pa 16 aña

ORANJESTAD – Abogado pa famia di e hoben Ayden Lanoy cu a keda tira mortalmente pa dos polis aña pasa, Geert Hatzmann, a considera e loke e polisnan a haci, como ‘Police Brutality’, osea brutalidad policial. Mes momento e la bisa dialuna den sala di corte cu famia Lanoy tabata gran parti di acuerdo cu e rekisitorio di fiscal, pero no cu e castigo. Envez di un castigo di 12 luna castigo condicional di prizon, nan merece 16 aña di castigo di prizon. Asina e la alega den su defensa cu a conta no menos cu 43 pagina dialuna atardi.

CALCULACION ROBEZ

E la cuminsa pa bisa cu e no ta di acuerdo cu ta papia cu polisnan a haci un calculacion robez di e situacion, sino mas bien cu loke nan a haci tabata brutalitad policial ‘den su forma mas optimal’. Mientras cu Aruba ta cay bou di mesun tipo di ley di Hulanda, Hatzmann a sigura cu e situacion na Aruba ta diferente y como tal mester midi esaki diferente. 

TIK OP DE VINGERS

Loke cu Hatzmann ta considera di e demanda di fiscal, ta manera e dicho hulandes ta bisa, e tabata un ‘tik op de vingers’. Esta un tipo di ‘hala di orea’ den papiamento crioyo. Ademas e abogado a considera e demanda como claramente ofensivo y hopi descuida. Den su opinion, papiando pa e famia, e polisnan mester haya un castigo di largo duracion. 

CASTIGO 

E castigo mester keda calcula diferente, unda cu ta sali di e punto di bista cu e liña di maneho pa un castigo di homicidio ta 12 aña pa un persona regular. Den e caso aki, e abogado a usa e siguiente analisis pa yega na e suma di e castigo. E circumstancia agravante di funcion di ehempel, mas abuso di arma di servicio: Esey ta un tercio di 12 aña cu ta 4 aña. Total hunto esaki ta suma 16 aña pa cada polis. Fiscal sinembargo a exigi ‘solamente’ 12 luna di prizon condicional. Huez lo dicta sentencia probablemente 2 di April proximo. Potret cortesia Daily Herald.