Corte: Accionnan paga ta conta manera bendí, asta sin firma

ORANJESTAD – Corte di husticia (Hof) a dicta cu un   co-fundador anterior di un compania Arubano no por comporta su mes mas manera accionista, aunke huridicamente su accionnan nunca a wordo transferi formalmente. Asina, e Hof a yega na un resultado diferente cu e huez di prome instancia den un conflicto largo tocante derecho riba bista den cuenta anualnan.

E caso tabata gira rond di e pregunta si e homber ainda tabata accionista di Safecom Safety & Communication Services N.V. y pa e motibo ey tin derecho riba tur cuenta anual di e compania.

Aunke nunca a traha un acto formal di transferencia, segun Hof ta cla cu e homber a ofrece su accionnan na benta caba na 2000 y 2008, y pa esaki entre 2013 y 2016 el a ricibi pago pa gran parti.

Segun e Hof, cu esaki a surgi un obligacion pa transferi e accionnan. Riba base di rasonabilidad y ekidad entre accionistanan, e anterior co-fundador for di 2016 no por ehecuta  derecho di accionista mas. P’esei e no tin derecho riba cuenta anual reciente di e compania.

Sin embargo, e actual director mester sigura cu e cuenta anualnan di e periodo 2009 te cu 2015 ainda wordo determina formalmente y entrega na dje. Esakinan e por usa den un posible procedura di daño y perhuicio tocante irregularidadnan cu anteriormente a wordo alegá den e compania.

Cu e sentencia, e Hof ta subraya cu derechonan di accionista por caduca di facto ora accionnan a wordo bendi y paga, aunke e transferencia juridico nunca a wordo completa totalmente.