Illis y Carlo: Kita e polisnan su culpabilidad cu ta conduci na retiro di tur consecuencia legal

ORANJESTAD — E dos polisnan envolvi den e caso Caret, Dirksz y Violenes a actua den defensa propio y mester declara nan no-recibibel of rechasa  e demanda. Durante e defensa di e dos polisnan, abogadonan Illis y Carlo a pinta un imagen cu e caso no ta un asunto standard: Segun nan, e ta un tragedia cu no a laga un ganador atras sino solamente perdida y dolor.

PALABRA NA FAMIA DI E VICTIMA

Notable ta cu den nan introduccion, abogadonan a duna condolencia na famila di e victima, Ayden Lanoy, y a reconoce cu e debate legal ta pasa riba fondo di un bida humano. Pero mes momento, defensa ta insisti cu e dos agente a haci nan trabou segun nan honor y conciencia, y cu nan mes ta carga cu un peso emocional grandi despues di e incidente, pasobra nan a mester uza e ultimo medio: nan arma di fuego.

UN NOCHI CU HOPI ALERTO

Segun defensa, a repasa gran parti di e shift di trabou di e dos polisnan, pa mustra cu no ta solamente e acto aki nan a traha e dia ey, un double shift, pero cu nan tabata prepara pe, fisicamente y a haciu esaki for di comienso di nan turno (shift), nan a sigui un serie di caso, den cual nan a actua corecto y cu tur e casonan aki a termina corectamente. Entre nan e duo   nan a maneha varios intervencion normal: keho di persona indesea, control di vehiculonan sin luz, un menor di 14 aña conduciendo, advertencia na un turista, y multanan pa falta di stoplicht. Mas laat, a bin meldingsnan di pelea na club Calibra y despues na HOH hospital, cu a subi nan estado di alerta aun mas, segun e relato.

E CONTROL CU A ESCALA

Defensa ta relata cu rond 05:10 anochi, nan a observa un Toyota Vitz cu no tabata tin luz tras y, segun nan, tambe sin luz dilanti y cu velocidad eleva. Nan a duna stopteken repeti, usando zwaailicht, sirena y un mensahe via loudspeaker: 'Polis, stop'. Segun defensa, e conductor a haci un fingi un movicion cerca rotonde (manera cu e lo bay para) y despues a drenta den un huida, pasa riba drempelnan y hiba su auto for di e ruta normal.

E HUIDA Y E CAYA SIN SALIDA

Defensa ta sostene cu e persecucion a dura mas of menos 15 minuto, cu poco trafico, y cu e persecucion a keda proporcional y sigur. Tambe nan a pone un punto fuerte contra e idea cu Centrale Post a manda nan pa para e persecucion: segun e pleitnota, varios colega a confirma cu e instruccion tabata pa para solamente si tabata bira peligro pa otro usadornan di caminda. Den un caya sin salida, e polisnan a klem e auto Vitz cu e auto di patruya. Pero, segun defensa, e conductor no a somete: motor bay na alto velocidad, (huez aki a remarca cu esaki no ta berdad y cu ningun momento esey tabata e caso, pero si e motor tabata sendi y e chauffeur a move pa crea espacio pa huy. Den e momento cu nan a sali for di patruya, nan a grita 'Para, para, para', pero segun nan, e auto a reversse y despues a brake y y bay dilanti cu e wielnan haciendo zonido.

'SPLIT-SECOND': PERCEPCION DI AGENTE

Base di e defensa ta e 'percepcion di agente' den e par di segundo decisivo. Segun e relato, Violenes a keda den e bista directo di e vehiculo, cu e patruya na banda drechi, y e ruta di huida na banda robez, cu poco espacio real pa scapa. Defensa ta bisa cu e auto a bini menos cu 5 meter for di e agente, cu motor cu forza, y cu Violenes a mester a bula pa un banda pa no wordo gara pa e auto. Dirksz, segun e pleitnota, a mira su colega den peliger y a reacciona pa stop e menaza. Defensa ta afirma cu nan a tira riba e caroseria/motor di e auto, no riba e conductor, cu meta principal tabata para e vehiculo y corta e riesgo inmediato.

DISPUTA RIBA VIDEO Y 'REFERENCIA'

Un parte importante di e defensa ta e analisis di e imagen di video. Abogadonan ta critica e 'ijkpunt' osea e referfencia cu Landsrecherche a usa pa determina e prome tiro, y ta planta duda riba e screenshots cu, segun nan, a wordo edita y cu timestamp original tabata corta. Nan ta cita tambe e observacion di e huez durante e zittting: cu un pluma di huma osea 'rookpluim' ta mas cla na 05:16:05 y cu e idea di 05:16:03 ta dificil pa sigui cu wowo cla. Huez a remarca pa no cambia su palabranan y despues tabata di acuerdo cu por usa e palabra ey. Segun defensa, e prome tiro a cay na e  momento exacto cu e auto ya a drenta den movimiento dilanti, directo riba Violenes.

 20 TIRO Y E PUNTO DI INTENCION

Den e pleitnota ta menciona cu total a los  20 tiro: 3 pa Violenes y 17 pa Dirksz. Defensa ta usa e reparticion di impactonan pa sostene cu meta tabata desactiva e auto y no mata e conductor.

MARCO HURIDICO

Alternativamente, e defensa ta argumenta cu, si Corte ta haña cu e límitenan di defensa nesesario a wordo surpasa, esaki a wordo causa pa un disturbio emocional fuerte u tabata e resultado inmediato di e asalto di e víctima. Esaki ta kita e cliente (e polisnan) su culpabilidad y ta conduci na retiro di tur consecuensia legal.

RECLAMO DI E PARTIDO ASERCA

Tocante e  demandanan di partidonan perhudica, defensa ta pidi pa declara nan no-recibibel of pa rechasa nan. Den e pleitnota ta declara cu danonan civil ta depende di ilegalidad; y si tribunal ta duna  retiro di tur consecuensianan legal, e base pa responsabilidad civil lo cay. Tambe ta wordo cuestiona e costonan di abogado y ta declara cu affectieschade no ta permiti den ley Arubano, mientras pa schokschade defensa ta bisa cu prueba medico/psychiatrico ta falta y cu e asunto ta demasiado compleho pa trata den proceso penal.

COLOCA E HECHO DEN CONTEXTO

E caso ta keda uno di e mas debati den Aruba: un stop pa falta di luz a termina den 20 tiro y un muerte. E defensa ta pidi tribunal pa mira e hecho den contexto di presion, adrenalina y e 'split-second' decision di polis, y no solamente den e calma di un sala di huez.