Caso Caret ta sigui: Tiro di polis riba victima tabata necesario of no?

ORANJESTAD - E prome dia di audiencia den e caso penal “Caret”, relaciona cu morto di Ayden Lannoy despues di tiro di polis, a concentra riba un pregunta central: tabatin un amenaza inmediato na momento cu polis a habri candela, of e situacion ya no tabata peligroso?

Noticiacla a raporta riba e caso diabierna caba, pero awe dialuna mainta e caso ta continua. Pero, segun loke a sali den corte diabierna, polis a intenta para un vehiculo pa control, pero e chofer a ignora señal di stop y un persecucion a sigui te na un caya sin salida. E auto di polis a blokea paso, despues di cual e vehiculo di sospechoso a move p’atras y p’adilanti. Agentenan a baha cu arma y tira, y aproximadamente binti tiro a wordo descarga. Un bala a impacta e chofer mortalmente.

VIDEO

Durante audiencia a menciona cu video posible ta mustra cu e auto tabata move p’atras na momento cu tiro a cuminsa y cu e velocidad tabata limita. E hechonan definitivo lo wordo determina mas adelante den e proceso. Posiblemente awe. 

MOMENTO EXACTO

Pa corte, e momento exacto cu polis a decide usa arma di candela ta decisivo. Eseki lo determina si e tiro tabata necesario pa defensa inmediato, of si e uso di violencia a keda desproporcional.

SENTENCIA HULANDES

Den seshon a haci referencia na un sentencia hulandes di 2017, unda corte a determina cu tira riba un auto cu ta huy despues cu peliger ya a caba, no ta defensa legitimo y por ta punible. E caso ey ta wordo considera relevante pa evaluacion di e evento na Aruba.

DEFENSA

Defensa posible como defensa propio lo depende di si amenaza tabata real y inmediato. Si resulta cu e vehiculo tabata retirando of peligro no tabata agudo, e posibilidad pa acepta e defensa ey ta limita. E video di incidente lo probablemente hunga un rol clave den siguiente audiencia, unda raport di experto lo analiza movimiento di auto, distancia y momento di tiro.

E caso lo sigui den siguiente dia di audiencia cu enfoke riba reconstruccon tecnico y evaluacion di proporcionalidad di e uso di fuerza.