Polis Violenes: Pa mi sali por di mi cas, mi tin cu disfrasa awor

ORANJESTAD – ‘Pa mi sali for di mi cas, mi mester ‘disfrasa’awor , agente policial M. Violenes a bisa huez diabierna mainta den corte. Esaki pa hende no reconoce. Tabata na final di e prome dia di tratamento di e caso, cu e huez a puntra e polisnan con nan situacion actual ta, un aña despues di e suseso. Ambos a keda afecta tambe, y no tin un bida facil. Nan ta hendenan conoci, hende tin rabia riba nan, nan no por bay niun caminda, y nan ta na cas sin traha. Huez a confronta ambos cu e si nan a pensa riba nan futuro. Huez a mustra nan cu na final di e caso, nan por sea keda absolvi totalmente di e cargonan, of keda sentencia na castigo di prizon. “Boso a pensa riba esaki caba? E huez a puntra. Violenes a bisa si, y Dirksz a bisa cu esey e la pensa for di momento cu e caso a sosode aña pasa. “Mi ruman ta yuda mi financieramente” e agente policial Dirksz a bisa huez na su turno. Ambos desde cu e suseso tragico a sosode, ta na cas, suspendi, ganando 75%  di nan Salario, y sin ningun otro beneficio extra cu polis tin derecho ariba. 

VIOLENES

Pa loke ta Violenes, e ta na cas, y casi no por sali. Pa evita cu hende ta dune problema, ora cu e sali mes, e mester sali disfrasa pa evita cu hende ta reconoce. Bibando antes di un salario basa riba 80 ora di trabou pa siman, incluyendo overtime y tur otro beneficio financiero, awor e mester midi con e ta gasta su placa. “Mi mester a scohe pa pan pa mi famia, envez di paga pa mi sessionan cu psicologo” Violenes a sigui splica. Notablemente emocional, e ta mustra cu e no por drumi bon, ta pensa tur dia riba e dia fatal aki, y ta purba deal cu esaki. E ta casa y tin un yiu di tres aña. Ora cu huez a puntr’e kico e kier a bisa e famia, e la bisa cu cu nunca e tabata kier pa a sosode loke a sosode. 

DIRKSZ

Pa loke ta Dirksz, e ta bisa cu e ta pensa tur dia, kico e lo por a haci diferente e dia di e suseso. E tin trauma, y e tampoco por a sigui cu su sessionan di tratamento psicologico, debi na problema financiero cu e tin aworaki. E ta bibando den un otro cas, cu no ta di dje, pa su seguridad, mientras cu e ta pagando  hipoteek si di su propio cas. Ora cu huez a puntre kico e kier bisa e famia, e la bisa cu ni kico e bisa e famia, e lo no cambia e situacion.