Mama di Ayden Lanoy den Corte:“ Mi yiu a wordo tira sin piedad”

ARUBA – Den un carta profundo yena cu dolor, e mama di e victima di tiramento aña pasa door di polis, esta mama di Ayden Lanoy, diabierna a dirigi su mes na e huez cu a trata e caso Caret. Aki e mama ta referi na su yiu Ayden como CJ. Den su mensahe, e mama ta bisa cla cu e asesinato di su yiu no por keda lubida ni minimalisa, y cu no tin ningun hustificacion pa loke a sosede. “Mi ta scirbi cu tur e dolor di un mama cu no kier pa e asesinato di su yiu wordo lubuda,” e la cuminsa na bisa. Segun e mama, su descontento principal ta e falta di claridad riba e motibo pa cu su yiu a wordo ataka cu bala. “Mi kier sa: kiko a pasa? Pakiko asina? Cua tabata e motibo pa e proceder ey?”

SEGUN MAMA: NO TABATIN AMENASA

E mama ta sostene cu CJ no tabatin antecedentenan penal ni hudicial, ni nunca tabata deteni pa pelea, robo of delito. “Ni pa e auto, ni pa number di e auto, ni pa ningun antecedente,” e ta enfatisa, rechazando cualkier insinuacion cu su yiu tabata un peliger. E ta pone pregunta directo: Pakiko no a duna su yiu un oportunidad pa rindi? Kiko a hiba polisnan na tira 20 bala riba un hende cu nan mes no tabata conoce? “Esaki no ta e procedura,” e mama ta afirma.

“MI YIU A WORDO NENGA E DERECHO DI BIDA”

Den un pasahe carga cu emocion, e mama a bisa cu su yiu tabata un hoben alegre, bromista, cu tabata desea un futuro di trabou y responsabilidad. Un hoben cu, segun e, a wordo ranca di e mundo aki sin razon, laga tras tur su soñonan como yiu, ruman, pareha y mayor di su propio yiu. E mama ta expresa cu e dolor cu a keda den su bida no lo cambia hamas. “No tabatin piedad, ni un di dos oportunidad pa un yiu cu tabata huyendo pa su bida,” e ta bisa.

CRITICA RIBA ACTUACION DI POLIS

Un di e punto mas fuerte di e carta ta e cuestion si polisnan por usa forsa mortal sin consecuencia. “Mi mester biba cu dos individuo cu a asesina mi yiu y ta bisa nan tabata hasi nan trabou?” e mama a puntra. “Acaso polis ta aki pa asesina pueblo sin consecuencia?” E mama reconoce cu comunidad tambe kier claridad y paz, pero pa un mama no ta facil acepta cu e mes cuerpo di polis cu mester trece siguridad y orden a trece luto permanente na su famia.

“DANKI PA SCUCHA DOLOR DI UN MAMA”

E carta ta sera cu un mensahe di dolor y dignidad: e mama a gradici e oportunidad pa expresa su sufrimento, recordando e fecha cu a marca su bida pa semper: diabierna 9 februari 2025.“Sin mas… e dolor di un mama,” e carta ta conclui. E caaso ta sigui bou investigacion huridico.