Huez a cuestiona polisnan den caso Caret pa nan uso di nan arma reglamentario

ORANJESTAD – Corte a cuminsa trata e caso di e hoben Ayden Lannoy cu a perde su bida ora cu dos polisnan M. Violenes y R. Dirksz a tira riba dje, cu resultado fatal aña pasa February. E caso, conoci como Caret, a inicia diabierna mainta algo pasa di 8’or y mei bou di hopi seguridad y control, pa primordialmente e famia di e polisnan, no topa cu e famia di e victima. Seguridad tambe tabata maximo cu por lo menos 5 agente di CEA den sala, para strategicamente. Segun fiscal den e sala, e dos polisnan ta acusa di e.o.  intento di homicidio involuntario. 

CON TUR COS A CUMINSA

E huez a cuminsa cu su interogacion profundo dirigi na e dos agentenan policial, y a finalisa e dia cu atencion pa e famia di e victima. A cuminsa reconstrui for di comienso ora cu e agentenan diadomingo marduga 9 di februari 2025 a haya un melding pa acudi na Lekker Restaurant pa un problema. Na caminda pa e sitio, e dos agentenan en cuestion a nota un auto Toyota riba rotonde na Superfood, cu tabata falta un luz sendi patras. A dicidi di core tras di e auto, usando e speaker di auto y zwaailicht pa ordena e chauffeur pa para. Segun declaracion di e polisnan inicialmente e chauffeur a duna indicacion di lo a para banda di caminda, pero a bira diripiente, pasa riba e subida na e rotonde, y dirigi su mes direccion Bubali. Ainda e polisnan tabata dune orden pa para, cu segun e polisnan, e chauffeur no a sigui. Es mas, segun e polisnan, e chauffeur a cuminsa core bay, pa cual e polisnan a informa central cu nan a inicia un persecucion cu e auto. E persecusion finalmente a hiba nan na un Callejon sin salida, den Madiki Kavel. Y aki cos a bay robez. Segun declaracion di e polisnan, nan a dicidi di aplica loke nan a siña como polis, esta di blokea e caminda cu nan auto pa e chauffeur no por sigui. E chauffeur notando esaki, a ripara cu e no por a sigui y a cuminsa reverse e auto. Y ta aki cos a bay completamente robez. 

TIRAMENTO

E polisnan a bisa cu dado momento nan a wak un luz den e auto Toyota, y tabatin intencion di atende e chauffeur riba su comportacion. Nan lo a baha for di e auto, y dado momento e polis manehando e auto (Violenes), a mira e auto para otro caminda. Aki e la bisa cu e la drenta un panico y a sinti su curpa menasa, ya cu e auto lo tabata haci movecion pa bin riba dje. E la sinti cu e chauffeur lo kier a manda e auto riba e polis(nan), usando e auto como un arma. Aki ta segun e polis, unda cu e la los e prome tironan den direccion di e auto. E otro polis mientrastanto tambe a bisa cu e la mira e situacion y tambe a nota e auto bin den direccion di su colega, pa cual e la cuminsa los tiro riba e auto, pero di un otro angulo. Hunto, entre nan dos, nan a los 20 tiro, di cual 17 tabata di e polis pasahero (Dirksz) y e polis Violenes a los 3 tiro. Despues a resulta cu, segun huez a splica, investigacion ta sugeri cu di e 20 balanan cu a cay, 1 di nan a alcansa e chauffeur, mortalmente. Y segun e huez a sigui bisa, e investigacion ta sugeri cu e bala a sali di e arma di e polis Dirksz. E bala cu a alcansa Ayden, a bora un arteria grandi di dje pa cual e victima a sangra bastante. Y ora cu a purba anime, ya tabata laat. 

PAKICO A USA ARMA Y NO RESORTA NA OTRO COS

Loke por a nota, ta cu huez a cuestiona e actuacion di e dos polisnan, primordialmente e echo cu nan a resorta na usa nan arma reglamentario pa ‘defensa’, contra e chauffeur di e auto cu nan a caba persigio. “Pakico bo a dicidi di tira cu bo arma”, e huez a puntra e prome polis Violenes. “Pakico no a opta pa hala un banda, ora cu bo a wak cu e auto lo tabata bin rib abo”. Aki Violenes a bisa huez cu e momento ey, di e angulo unda cu e tabata, e tabata teme pa su bida, y a opta e momento ey pa tira. Ora cu huez a puntre, kico e tabata pensa e momento ey, e la admiti cu e la drenta un panico. Pasando pa e di dos polis, huez a haci e mesun pregunta. Aki tambe e polis Dirksz a splica cu e la mira cu e auto tabata bin riba su colega. “E no por a bay ni links ni recht”.   Ademas, e tiro a bin, despues cu e mes a tende un tiro. “Mi a tende un tiro, pero mi no tabata sa di unda e la bin”, e la sigura e huez. Esaki siendo cu un rato prome e la bisa huez cu e la mira su colega, den skina di su wowo. “Pero mi no por a wak si e tabatin arma saca of no”. Huez tabata cuestiona Dirksz tambe y aki tambe e la puntr’e kico e la sinti e momento ey. “Tur cos a bira scur mi dilanti”, Dirksz a bisa. E no por a bisa huez cuanto tiro e la los y unda su tironan a bay, contrario na su colega cu si a specifica unda su tironan a cay. “Mi no ta corda”.  Huez a mustra e dos polisnan riba e seriedad di uso di arma, y cu esaki tin consecuencia. Ora cu a usa e imagen di video pa mustra e parti visual, aki tambe e polisnan tabatin nan contesta. Huez ademas a cuestiona e echo cu a opta pa tira riba e hood di e auto, siendo cu for di e video por mira cu e acto ey, lo no a para e auto di sigui core. 

LOKE E VIDEO TA MUSTRA NO TA LOKE A SOSODE

Loke a hala atencion den corte ta ora cu e agente Violenes, a bisa huez cu e loke ta wordo mustra riba e video, no ta loke e la experencia. Sinembargo, ora cu huez puntra e colega  Dirksz, e si a bisa cu manera cu e video ta mustra e accion, asina e tambe a experencia e caso. Huez a cuestiona e uso di arma, y cu nan no a resorta na otro forma pa resolve e problema. Entre nan, cu por a laga e auto bay, y despues deal cu ne. Of ora cu segun nan, e auto tabata bin riba nan, nan por a hala un banda.  E polisnan ambos a bisa cu eynan, no tabatin e posibilidad ey y cu nan tabata insisti cu pa nan, e auto tabata dirigi riba nan. Huez a mustra cu segun su interpretacion sinembargo di e video, ningun momento e chauffeur a purba manda e auto riba nan, y mas bien, tabata purba di huy for di e lugar, unda cu riba video por mira e intento ey di e chauffeur. Ademas, e speed cu cual e auto tabata move, no tabata uno cu tabata menasante pa e polisnan. 

KI ORA A TIRA

Un discussion cu lo haya mas tratamento dialuna, ta e pregunta, ki ora a tira, y  pakico. Esaki pasobra tin un discrepancia segun e video, cu e polisnan a tira riba e auto, ora cu e tabata bin riba nan, pero segun e video, ta mustra cu polisnan a cuminsa tira ora cu e auto tabata bay den reverse, despues cu e polisnan a blokia su caminda. Ademas, ta mustra segun e huez, cu e polisnan a sali for di e auto, cu arma den man, cla pa tira. Ambos polis a para riba nan punto, cu contrario loke cu ta wordo bisa y cu lo por mira riba e video, ambos a sinti nan mes menasa y pesey a actua manera cu nan a actua. Dialuna mainta e caso ta continua unda cu fiscal lo presenta su demanda contra e dos polisnan y e abogadonan lo haya chens di defende nan clientenan.