Periodista Nelson ‘Speed’ Andrade mester ta bek den corte dialuna pa caso New York

ORANJESTAD - Dialuna 9 di februari 2026 lo tuma lugar regiezitting den apelacion di e caso penal ‘New York’ , unda cu periodista Nelson ‘Speed’ Andrade tin cu presenta.  Un regiezitting ta un sesion den Corte di Prome Instancia of den Corte Comun di Husticia pa prepara pa trata contenido di un caso.  Durante e regiezitting di dialuna awor ta bay mira con ta para cu e investigacion y particularmente si mester di investigacion adicional, manera si mester scucha mas testigo, prome cu e contenido di e caso mes wordo trata.  Siguientemente Corte ta dicidi si e caso por wordo trata den su contenido y ta pone un fecha.

E CASO

E caso New York ta trata di corupcion administrativo y violacion di secreto di trabao di parti di un agente policial y cuatro periodista den e periodo di januari 2021 te maart 2023. Corte den Prome Instancia a condena nan esten pa castigonan di prison (condicional) y trabao pa comunidad. 

APELACION

Varios di e sospechosonan den e caso aki a bay den apelacion contra nan condena den Corte den Prome Instancia. Sinembargo, solamente un di nan a efectivamente sigui cu su apelacion. E otro cuatronan a accepta nan condena. 

ANDRADE

E regiezitting di dialuna awor ta unicamente tocante e sospechoso Andrade   cu a wordo sentencia den Corte den Prome Instancia pa un castigo di prison di 18 luna, di cual 12 luna ta condicional, cu un tempo di prueba di 3 aña. Den su caso, tanto Ministerio Publico como Andrade a apela su sentencia. E la haya e sentencia mas pisa di tur 

TIN MAS SU TRAS

Un di e motibonan pa cual Ministerio Publico ta actuando asina, y cu loke a wordo bisa e tempo ey,  ta debi na falta di espacio na KIA pa cera hende, esta cu no tin suficiente cel. “ Ministerio Publico kier hasi uso eficiente di e espacio limita pa trata caso cu Corte Comun di Husticia ta dispone di dje . Door cu e cuatro casonan aki no mester bin dilanti mas, tin espacio pa otro casonan penal, por ehempel di violacion of homicidio, cu pa motibo di esaki e Corte Comun di Husticia por trata nan mas lihe”. Ora cu OM a puntra e 4 periodistanan si nan ta apela, a bisa cu no, y e ora OM tambe a dicidi cu no ta apela. Pero manera indica caba, cu dos, Noticiacla a compronde cu OM lo a yega na un acuerdo pa retira e apelacion. 

REGIEZITTING

Asina cos a bay segun Ministerio Publico,  den e caso aki tambe y a resulta cu solamente e sospechoso Andrade, a dicidi pa no accepta su condena. Pesey e caso lo wordo trata den forma di regie-zitting dilanti Corte Comun di Husticia dialuna awor. Expectativa ta cu e tratamento den su contenido lo tuma lugar den e prome mitar di 2026. Na un regiezitting e Corte Comun di Husticia ta tuma solamente desishon riba e pregunta si tin mester di investigashon adicional.

ANDRADE SU REACCION

Andrade den un reaccion breve na Noticiacla na december ultimo, a confirma loke cu Ministerio Publico a anuncia mas tempran awe, pero tin un pensamento su tras. “Mi a contesta cu mi ta willing (pa no apela:red) pero si yga na un acuerdo pa paga un multa pa e straf”, Andrade a bisa. Pero, segun Andrade, Ministerio Publico lo no a bay di acuerdo. “Parce cu nan no kier. Bo tin gebrek aan cel, pero bo kier cerami” Andrade a sigui bisa. E otronan si OM a bay di acuerdo, pero cu Andrade no. “Awor nan a keda cu ami so” Andrade a sigui bisa, y ta sugeri cu OM ta tras di dje mes, manera cu tabata pensa prome. Por corda tambe cu durante e periodo en cuestion, e polis envolvi esta Vos, mes a declara cu den e asunto aki, tabata parce cu autoridad (OM) tabata tras di Andrade specificamente. “Andrade boso kier cera”, e la declara e tempo ey.