E di cinco edicion di Annual Aruba Christmas Fair ta e weekend aki

SAN NICOLAS — E espirito di fiesta ta biba atrobe den curazon di San Nicolas ora ArtisA, hunto cu su sponsor VNO Aruba, Let’s Act, Aruba Tourism Authority, y Elite Production, ta presenta cu orguyo e di cinco Annual Aruba Christmas Fair riba diasabra awo 20 di december 2025 di 7:00 PM te 11:00 PM den Promenade di San Nicolas. E evento a nace den 2018, ora ArtisA a cuminsa ilumina e Promenade pa trece alegria y union durante temporada di Pasco. Añanan despues, e idea chikito a crece pa bira un tradicion stima riba nos isla y den nos capital di arte di Caribe – San Nicolas. E edicion 2025 ta priminti un anochi vibrante y creativo cu tur hende por disfruta. Mas di 40 productor y artesano local lo ta presente cu regalonan artistico, producto local y delicia pa e dianan di fiesta, mientras musicantenan Arubiano lo yena e Promenade cu ritmo y alegria.  E Youth Art Fair ta un novedad special di e aña aki: mas di 30 hoben talentoso lo expone y bende nan obra di arte original, un oportunidad pa conoce y apoya e generacion nobo di artistanan local. Ademas, nos lo tin un punto pa saca potret navideño cu decoracion y luznan pa capta bo momentonan mas bunita pa social media.

Riba e mesun anochi, tur amante di arte por participa den dos workshop creativo: Un ta e Driftwood Workshop cu Alejandra Vallejo den ArtisA Gallery of e Bottle Painting Workshop cu Angela Croes den Space21. Espacionan ta limita, si ta desea di participa den esaki please whatsapp +2975934475. E entrada pa Aruba Christmas Fair ta completamente gratis. Trece bo famia, bo amigonan y bin disfruta di un anochi yena di arte, musica, alegria y espirito navideño na San Nicolas. “Loke a cuminsa cu algun luznan den 2018 a bira un evento cu henter comunidad ta spera cu amor,” e ekipo di ArtisA ta bisa cu emocion.” E Christmas Fair ta pa nos tur; pa uni, pa celebra, y pa briya hunto.” ArtisA ta expresa un danki grandi na e sponsor y partnernan VNO Aruba, Let’s Act, Aruba Tourism Authority, y Elite Production pa nan apoyo continuo y fe den poder di arte y comunidad. Pa bo keda actualisa cu informacion y sorpresa, sigui nos riba Facebook: Aruba Christmas Fair of manda un mensahe via WhatsApp na +297 59334475.