Aruba Fashion Week 2025 ta finalisa marcando un era nobo di crecemento, creatividad y alcance global

ORANJESTAD – E edicion 2025 di Aruba Fashion Week (AFW) a yega oficialmente na su fin, y e organizadornan ta orguyoso di anuncia cu e evento a resulta un exito rotundo. “ E crecemento y evolucion continuo di AFW a keda evidente, no solamente den e presentacionnan eleva di cada show, pero tambe den e alcance creciente di e plataforma, cu a atrae atencion sin precedente for di comunidad local, prensa internacional y amante di moda riba nivel mundial” e organisadornan ta bisa.

Di diahuebs 11 te diadomingo 14 di december, Aruba a bira e epicentro di glamour y expresion artistico, caminda fashionista, diseñador, representante di medio y invitadonan a reuni pa celebra creatividad, artesania y elegancia Caribeño. E organizadornan a expresa nan gran satisfaccion cu e tantisimo reaccion positivo ricibi for di partner, diseñador y publico general, reafirmando e posicion di AFW como un di e eventonan di moda mas importante den e region.

E evento tambe ta celebra e contribucion notabel di tur diseñador Arubiano y internacional cu a comparti nan vision artistico cu e plataforma.

E team di AFW, boluntarionan y e publico fiel a hunga un rol esencial pa haci e edicion aki inolvidabel, demostrando un biaha mas e pasion di comunidad pa arte y industria creativo.  

Mirando pa futuro, AFW ta cu hopi entusiasmo pa e efecto positivo cu e edicion 2025 lo genera den promocion di Aruba riba mundo. Comunidad di moda ta warda cu gran expectativa e anuncio di FDLA/NYFW riba cual diseñador local lo representa Aruba na New York Fashion Week na februari 2026. Durante e proximo aña, AFW lo sigui traha cu su alianzanan pa impulsa e talento Arubiano riba plataforma internacional.