Magic FM y Discovery Travel ta haci soño di un wela bira realidad

ORANJESTAD   - Danki na e emisora Magic FM y e agencia di biahe Discovery Travel, un nieto por bin pasa su vacantie na Aruba, cu tabata e deseo di e wela. E siman aki a tuma lugar e entrega oficial di e premio principal di su campaña “Pasco na Cas”, un iniciativa di e emisora cu e meta pa reuni famianan Arubiano durante e dianan di fiesta. E proyecto tabata un idea original di Magic FM, y Discovery Travel a uni hunto cu hopi agrado pa celebra asina su 34 aniversario na un manera cu ta duna hopi balor na comunidad.

E ganador afortuna ta Sofia, e wela di Kevin Florencio, un studiante hoben Arubiano cu ta studia na Amsterdam. Awo Kevin por bin Aruba pa celebra Pasco y Año Nobo hunto cu su famia, danki na un voucher di Afl. 3.500,- pa pasashi aereo, ofreci pa Discovery Travel y Magic FM como premio principal di e sorteo.

E entrega a tuma lugar diaranson atardi, caminda Rob y Mary Spellen, doñonan di Discovery Travel, hunto cu Erin Croes, director y personalidad principal di radio Magic FM, a entrega e voucher na Janine Figaroa, mama di Kevin, den un ambiente di hopi emocion y gratitud.

E chens den e sorteo tabata danki originalmente na Sofia, wela di Kevin, kende a yama durante e programa Pasco Encanta riba Magic FM. Su deseo sincero tabata pa su nieto bin pa e dianan di fiesta y awo esaki a bira realidad.