Botica di Servicio: Awe nos ta celebra Doris Geerman-Henriquez!!!

ORANJESTAD - Awe nos no ta celebra e hacimento di aña di Doris pero tambe cu Doris ta baha cu pensioen merecidamente, despues di 33 aña den servicio.  Doris ta un cara cu tur hende ta conoce den Botica Eagle, Maria, Noord y Seroe Preto.

Su trayecto a cuminsa cu hopi sacrificio como hulp na botica Eagle, casa cu dos yiu anto ademas bai scol anochi di Apothkere Assistent di 5pm pa 10pm. Di e 6 studiante nan Doris ta e unico cu a slaag sin haci 1 her. Dia 1 di november 1992 e la officialment cuminsa traha como Apotheker Assistant na Botica Eagle, y desde e moment ey, Doris a crece hunto cu nos boticanan.

Doris a traha literalmente den tur botica, semper kla pa yuda, kla pa trece calmo y cariño den cualkier situacion. Su dedicacion na Distributie tambe a keda un parti importante den su historia desde e tempo cu tur cos tabata handmatig, te cu nos a pasa na e sistema di Pillenrol. Poco assistenten por bisa cu nan a pasa tur esaki!

Incluso despues di un dia largo na Seroe Preto of Maria, Doris tabata ainda pasa na tehuizen pa entrega medicamentonan urgente.

Esaki ta Doris: semper presente, semper cu curason.

Doris… nos kier bisa DANKI di curason.

Pa tur e anjanan di servicio, sonrisa, compromiso y amor pa nos clientenan y pa nos team.

Nos ta desea bo un pensioen hopi bunita y trankil.