Chef Arubiano, Jake Kelkboom, ta gana titulo maximo di 'Caribbean Chef of the Year’

ORANJESTAD – E Chef Arubiano, Jake Kelkboom, a gana e titulo prestigioso di 'Caribbean Chef of the Year’, na e competencia di: Taste of the Caribbean 2025. E competencia culinario mas importante di nos region cu a tuma lugar e siman aki na Barbados. Recientemente Noticiacla tabata e prome pa raporta e resultado di e seleccion di Aruba cu tambe a bolbe Aruba cu 4 premio. Pero a resulta cu un di e premionan grandi, a bay pa un Arubiano, residencia actualmente na Boneiro.  Y pesey, aunke Jake a representa Boneiro, unda e ta biba y traha na e momento aki,  Aruba por ta orguyoso cu un yiu di tera a gana e competencia cu ta ariba un nivel halto.

Ademas cu e la gana e titulo principal, Jake tambe a gana:

Caribbean Chef of the Year

Best Plate Representing Caribbean Flavors

Certified Angus Beef Award

Best Caribbean Team Award (cu Team Bonaire)

Informacion cu Noticiacla tin ta cu tur esaki ta talento cu a wordo cultiva na su pais natal Aruba! 

STUDIANTE DI EPI

Jake, un ex-studiante di collegio EPI, a cuminsa su carera culinario na Aruba, unda e la core stage na Marriott Resort y Screaming Eagle. Eventualmente e la sigui su carera na Hulanda, unda e la jega e nivel di Sous Chef di tres cushina, incluyendo un cushina cu e strea renombra ‘Michelin'. Na 2023, Jake a regresa Aruba pa traha na Ever Restaurant. Akinan e la contribui pa trece e restaurant den e 'top 5’ ariba Trip Advisor. Aña pasa Jake a muda pa Boneiro pa yuda habri un concepto innovativo, Pier 2, y na e momento aki e ta Executive Chef di Rum Runners na Boneiro.

UN ORGUYO INMENSO PA ARUBA!

Aunke cu e la competi pa nos hermana isla, Jake ta un producto autentico di Aruba, cu talento, disciplina y un pasion increibel  pa sabor Caribense. Aruba por ta orguyoso cu un di nos yiu di tera a bira e miho chef di Caribe!