WEB a suspende aumento di tarifa di awa temporalmente!

ORANJESTAD – WEB Aruba NV diabierna den un anuncio mes sorpresivo cu esun anterior, a dicidi pa suspende e aumento di tarifa di awa anuncia pa awe, temporalmente. Asina e compania a informa diabierna mainta trempan. Segun e compania, nan a dicidi pa tuma tal decision, den consulta cu e accionista Utilities Aruba NV. Mientras ta bisa temporalmente, no ta conoci con largo esaki lo keda suspendi. For di ayera nochi, noticiacla a tende e rumor aki y a puntra minister di energia Glenbert Croes si esaki tabata berdad. E mandatario a reacciona bisando solamente cu awe mainta e lo tabata topico di discusion den conseho di minister.  

E AUMENTO

Tabata apenas ayera diahuebs cu WEB a anuncia e aumento cu mester a drenta na vigor awe. E mensahe entre otro tabata bisa  cu ‘entrante 1 di juli tarifa di awa ta subi cu un averahe di Awg. 1.50 pa m3. E aumento ta debi na un aumento drastico di Heavy Fuel Oil (HFO) di ±126%, compara cu aña 2021. Hunto cu e aumento e compania di awa y energia ta introduci un structura di tarifa nobo, cual ta conduci na un particion mas husto entre consumidornan grandi y consumidornan chikito. Clientenan lo nota e aumento di tarifa pa prome biaha den cuenta di awa di augustus 2022’. Pa e relato completo por click AKI.