Wever a reclama NRC pa a saca su entrevista fo’i contexto

ORANJESTAD – E entrevista cu e corant Hulandes NRC Handelsblad a tene cu prome minister di Aruba siman pasa, a trece problema na Aruba debi cu ‘a saca e entrevista for di contexto’. Asina e mandatario a confirma pa NoticiaCla dialuna. E entrevista tabata riba varios tema manera Venezuela, riba e tema di refugiado etc. Wever a sigura cu su contestanan tabata den direccion cu Aruba ta preparando su mes pa cualkier situacion cu por surgi, incluyendo e prijsplaatje.

TROCE ENTREVISTA

Segun e mandatario, varios palabra a keda troci y a haci como si fuera cu el a bisa cosnan den un contexto mas pisa, creando un impresion diferente pa loke ta relacion entre Aruba y Hulanda. Ta trata di por lo menos 3 pa 4 declaracion cu e mandatario mester a coregi. A pidi e corant mientrastanto publica e version corecto di e entrevista.

CAMBIA PALABRA

Segun Wever ta trata di tres palabra specifico. E no ta contento cu e loke cu NRC a haci. E prome ta den e titulo di e articulo. “E (articulo) ta bisa cu mi ta hekel, esta cu mi ta odia e actitud di Hulanda” Wever a bisa. “Ami no ta odia e actitud di Hulanda y claro cu mi no a bisa esey. Mi a te hasta bisa cu mi tin poco comprension pe” Wever a sigui bisa. E di dos palabra of frase cu tabata robez tabata cu Wever lo tabata ‘irrita na e actitud di Hulanda.”Ami no ta irita lihe. Y sigur no pa Hulanda. Si mi irita, ta pa otro cos. Ademas, mi tin comprension pa e posicion di Hulanda” Wever a sigui bisa. E di tres punto cu e articulo a cita robez segun Wever, ta cu e lo a bisa cu minister Hulandes di relacionan exterior Stef Blok ora cu el a bay Venezuela pa firma e protocol recien, cu e lo a haci un show y cu Wever lo tabata invita p’e y no kier a bay. “Uno, mi no tabata invita pe. Dos, mi no a menciona ningun momento nada di show. Kier men cu ta e tipo di palabranan ey cu a cay realmente den mal tera” Wever a bisa. E mester a splica Hulanda su gobierno (Blok) kico a sosode realmente, pa evita cu tin problema innecesario.

COREGI INFORMACION

Wever a bisa e portal aki cu a bisa e corant NRC cu e no ta aprecia cu nan ta hinke den un atake politica interno di Hulanda. “No ta mi asunto kico nan ta haci na Hulanda. No ta mi asunto unda cu Stef Bloke kier bay of no. Ta nan tin cu deal cune. No usa ami pa esaki” Wever a sigui bisa. El a pidi e corant pa publica su version cu e la manda y ta pendiente pa wak si nan ta hacie. Otro corantnan a pick up e version ey. “Mi ta sinti cu nos a pone bek den e bon contexto. Importante ta cu nos tin un problema hopi serio na Aruba” Wever a bisa pa loke ta e situacion financiero. E mester sosten, y no mester di wega politico cu Hulanda. “Mas sosten di Hulanda lo a yuda” Wever a sigui bisa.