Parlamento a aproba mocion unanimemente pa pidi Hulanda claridad riba anotacionnan di Beatrix tocante Betico Croes

ORANJESTAD — Parlamento di Aruba a aproba awe un mocion presenta door di fraccion MEP unanimemente, pidiendo pa Gobierno di Aruba busca claridad formal serca Gobierno Hulandes riba e controverti anotacionnan personal di Princesa Beatrix tocante Betico Croes. E mocion, trata durante Reunion Publico No. 5 di 4 di november 2026, ta referi na pasahenan publica recientemente den anotacionnan personal di Beatrix for di 1983, unda ta menciona Betico Croes cu e frase: “Tijd winnen! Hij zal eens wegvallen. Dat afwachten.” Tambe, segun e mocion, den anotacionnan personal di Reina Juliana tabatin referencianan negativo tocante Croes.

Segun e mocion, e pasahenan aki ta laga pregunta serio tocante e significado di e palabra “wegvallen” y tocante e informacion cu Gobierno Hulandes tabatin na e tempo ey. Pa e motibo ey, Parlamento ta considera importante pa haya mas claridad tocante eventual nota di maneho, scenario, draaiboek of otro documentonan relevante.

E mocion ta encarga Gobierno di Aruba pa pidi Gobierno Hulandes oficialmente pa duna aclaracion riba e significado di e pasahenan menciona, e informacion cu nan tabatin na e tempo ey y e existencia di eventual documentonan oficial relaciona cu e tema. Ademas, Gobierno mester informa Parlamento por escrito riba e contesta y riba resultado di e investigacion pidi.

Tambe, Presidente di Parlamento lo mester pone e mocion y e peticion pa aclaracion na conocimiento di Presidente di Tweede Kamer den Hulanda y di e comision fiho pa Relacionnan den Reino, cu peticion pa trata e asunto y pidi aclaracion na Gobierno Hulandes.

Cu e aprobacion unánime di e mocion, Parlamento a manda un señal cla cu e kier claridad  total riba un capitulo sensitivo den historia politico y constitucional di Aruba, particular pa loke ta toca e papel historico di Betico Croes den e camino pa Status Aparte.