Fernandes Pedra a pidi cambio di huez: caso di dos morto atrobe suspendi

ORANJESTAD — Loke mester tabata e prome tratamento completo di e caso penal contra Chania Fernandes Pedra, acusa den conexion cu e accidente fatal cu a cobra bida di dos persona na januari di e aña aki, a termina diaranson atardi den un giro inespera. Despues di un audiencia marca pa discusionnan intenso, varios suspension y finalmente cuminsamento di tratamento di e caso, e acusado a presenta un peticion formal pa cambia e huez. E peticion, conoci den termino huridico como wrakingsverzoek, a obliga e huez pa suspende e proceso inmediatamente. Awor tres otro huez lo mester dicidi si e huez actual por continua tratando e caso, of si un otro huez mester tuma su luga. E caso a keda posponi pa 18 di november, 1:30 di atardi, mientras cu e peticion pa cambia huez lo wordo trata diabierna 6 di november, pa 10'or di mainta.

HUEZ A DICIDI PA SIGUI SIN ABOGADO

E tratamento diaranson merdia a cuminsa cu un discusion largo tocante e hecho cu Fernandes Pedra ainda no tin un abogado pa defend'e, apesar di varios intento durante e ultimo lunanan pa haya representacion legal. E huez a duna un resumen extenso di tur e esfuerzonan cu Corte a haci pa busca abogado, tanto na Aruba como na Corsou. El a recorda cu e acusado inicialmente tabatin varios abogado paga pa su famia, pero cu posteriormente nan a retira for di e caso. Tambe a existi diferencia tocante e admision di un abogado di Hulanda, mientras cu otro abogadonan cu Corte a logra identifica no a acepta e caso bao e condicionnan financiero ofreci, of no a logra yega na un acuerdo cu e acusado. E ultimo intento a fracasa despues di un combersacion entre Fernandes Pedra y un (ultimo) abogado di Corsou. Segun e acusado, e abogado a trata cu ne den un manera cu e a considera descortes, specificamente a yame ‘brutaal’, specialmente tocante declaracionnan cu su famia lo a haci na prensa contra e supuesto abogado aki. E acusado a sostene cu e no por acepta un abogado cu kende e no tin confianza.

INTERES DI E FAMIANAN TAMBE TA CONTA

Fiscal di Husticia na su turno, y den un tono poco irita, a reconoce cu derecho di un acusado pa haya asistencia legal ta fundamental, pero a argumenta cu e derecho aki mester wordo considera hunto cu interesnan di e otro personanan involucra. Fiscal a destaca cu e caso ta pendiente pa casi dies luna y cu famianan di e dos victima ta pasando repetidamente door di e proceso emocional di presenta na Corte, sin cu e caso por yega na un final. Segun Ministerio Publico, despues di cinco audiencia y numeroso intento pa logra representacion legal, a yega momento pa e proceso continua. E representante legal di un di e famianan afecta tambe a expresa preocupacion tocante e demora continuo y e efecto cu esaki tin riba nan proceso di duelo. Despues di un suspension pa evalua e posicionnan, e huez a anuncia, cu evidente preocupacion, cu e caso lo continua sin abogado. El a enfatisa cu esaki no ta e situacion ideal, pero cu Corte no ta mira un perspectiva concreto pa logra representacion legal den un termino cortico.

ACUSADO A KIER SALI FOR DI SALA

E decision a provoca un reaccion emocional cerca Fernandes Pedra, kende a expresa cu e no ta sinti su mes den condicion pa defende su caso sin asistencia legal. E acusado diripiente a lanta para na yoramento, y kier a sali di e sala, unda cu e seguridad a par’e y mustre cu e no por haci tal.  A sigui un intercambio entre e huez y e acusado tocante su derecho pa keda presente of bandona e audiencia. E huez a splica cu e no tabata obliga pa permanece, pero cu e proceso por continua den su ausencia. Despues di varios intercambio y suspension, Corte finalmente a cuminsa trata e caso den contenido.

IMAGENNAN DI E ACCIDENTE A WORDO MUSTRA

Durante e tratamento, e huez a presenta un descripcion di e accidente di 4 di januari 2026, basa riba declaracionnan di testigo, investigacion policial y otro material den expediente. Segun e informacion presenta, un auto a pasa cu un velocidad sumamente halto riba e brug di Renaissance, na momento cu un grupo di persona tabata crusa caminda. E huez a relata declaracion di un polis cu a presencia e accidente y cu a describi con e vehiculo a dal e grupo, causando e morto di dos persona. Tambe a wordo presenta informacion tocante investigacion tecnico, posicion di e victimas despues di e impacto y e sospecha cu e acusado tabata bao influencia di alcohol. Tur esaki tabata un descripcion basta detaya, consecuentemente causando tristesa den sala pa parti di familiarnan di e victimanan. Descripcion con a haya e mama tira abou, faltando pia, weso afo, y mas detaye grafico, a pone cu algun familiar a bandona e sala pa no tende mas. Durante e audiencia a mustra imagen di camara di seguridad cu ta forma parti di e investigacion. E huez a averti e presentenan cu algun imagen tabata fuerte.

E ACUSACIONAN

Fiscal a lesa un total di 5 acusacion contra Fernandes Pedra, cu ta inclui 5, entre otro, homicidio, intento di homicidio, bandonamento di luga di accidente, conduci bao influencia di alcohol y maneho sin rijbewijs valido. E acusacionnan ainda mester wordo evalua pa Corte y no ta significa cu culpabilidad a wordo establece.

PETICION INESPERA PA CAMBIA HUEZ

Mientras e tratamiento tabata andando, y cu tur hende a kere cu awor e caso finalmente por a wordo trata, un personal di corte diripiente a entrega un documento na e huez, firma pa Fernandes Pedra. E documento tabata un asina yama wrakingsverzoek: un peticion formal pa retira e huez actual for di e caso. E argumento central di e peticion ta relaciona cu e decision di e huez pa continua e proceso sin cu e acusado tin abogado. Fernandes Pedra ta cuestiona si e huez por sigui tratando su caso bao e circunstancianan ey.Ora cu huez a puntra e acusado, pakico e kier e cambio, e acusado a usa su derecho di silencio.  E huez a splica e ora cu cu e no por dicidi personalmente riba un peticion pa cambia su mes. E decision ta corresponde na un wrakingskamer, un grupo di tres otro huez cu lo evalua e peticion. Como consecuencia, e huez a indica cu tur hende por compronde cu e no por continua tumando decision tocante contenido di e caso mientras e peticion ta pendiente. E wrakingskamer lo trata e peticion diabierna mainta 6 di november, pa 10'or, y e caso penal ta programa pa sigui diaranson 18 di november, pa 1:30 di atardi. E decision di diabierna lo determina si e mesun huez por continua cu e proceso of si un otro huez mester tuma e caso over. Asina, despues di casi dies luna di proceso, varios audiencia y numeroso intento pa soluciona e problema di representacion legal, e caso penal cu a causa tanto conmocion na Aruba ta enfrenta un obstaculo nobo. E pregunta awor no ta solamente ki ora e caso por wordo trata completamente, sino tambe ken lo ta e huez cu finalmente lo dirigi e proceso contra Fernandes Pedra.