Eman ta nenga impasse den coalicion y ta insisti riba aumento di salario minimo

ORANJESTAD — Prome Minister Mike Eman ta nenga cu actualmente tin un impasse entre AVP y FUTURO tocante aumento di salario minimo te na nivel di subsistencia (bestaansminimum). Segun Eman, e diferencia entre e dos partido ta principalmente den e velocidad cu cada uno kier avansa cu e medida. Eman a haci e declaracion diaranson despues di su audiencia regular cu Gobernador Alfonso Boekhoudt. El a aclara cu su bishita na Gobernador tabata rutinario, y no relaciona cu un eventual crisis gubernamental. "No tin un impasse actualmente. Tin un diferencia di enfasis entre e partidonan," Eman a splica, añadiendo cu FUTURO tambe ta reconoce importancia di mehora salario, pero ta desea mas tempo pa dialogo.

DIALOGO NO POR BIRA UN OBSTACULO

Eman a critica e actitud di algun representante di sector comercial, cu segun e, durante mas di un aña y mei no a participa efectivamente den e dialogo tocante aumento salarial. Segun Prome Minister, Gobierno ta dispuesto pa negocia compensacion, reduccion di impuesto of otro medida pa alivia e carga financiero di empresanan, particularmente negoshinan chikito y mediano. Sinembargo, el a adverti cu dialogo no por bira un instrumento pa pospone e aumento indefinidamente. Eman a rechasa tambe e atacanan personal y e tono cu e discusion publico a tuma, insistiendo cu diferencia di opinion mester wordo trata cu argumento y cifra.

SALARIO ACTUAL NO TA SUFICIENTE

Eman a defende necesidad di aumento salarial, señalando cu hopi famia no por cubri nan gastonan basico cu e entrada actual. "Si bo ta gana 2.100 florin y bo mester 2.600 florin pa biba minimamente, bo tin un deficit di 500 florin. No ta hustifica pa hende biba asina," el a argumenta. Segun Eman, Aruba su crecemento economico, particularmente den turismo, mester beneficia tambe e trahadonan. El a señala cu prijsnan den sector hotelero a subi considerablemente durante e ultimo añanan, mientras cu salario minimo no a sigui e mesun ritmo.

DIFERENCIA TOCANTE BESTAANSMINIMUM

Un otro punto di discusion ta e propuesta pa conecta salario minimo directamente cu nivel di subsistencia. Segun Eman, sector comercial tin reserva tocante e vinculacion aki. Prome Minister a splica cu e bentaha di tal sistema ta cu salario minimo por ahusta automaticamente ora costo di bida subi, evitando cu trahadonan bolbe perde poder di compra. Eman a expresa confianza cu AVP, FUTURO y gremionan comercial por finalmente yega na un acuerdo. El a enfatisa cu e prioridad di su Gobierno mester keda e mesun: garantisa cu crecimiento economico di Aruba traduci den un mehor calidad di bida pa e personanan cu menos recurso.