Gerlien Croes: FUTURO kier dialogo, no caida di gobierno

ORANJESTAD — Minister Gerlien Croes (FUTURO) a declara cu su partido no ta buscando caida di Gabinete AVP–FUTURO, pero ta exigi claridad y dialogo tocante aumento di salario minimo te na nivel di subsistencia (bestaansminimum). Despues di su bishita na Gobernador Alfonso Boekhoudt, Croes a expresa preocupacion cu Gobierno ta sintiendo presion pa tuma un decision sin cu tur consecuencia economico y presupuestario ta suficientemente prepara.

IMPASSE

E declaracion ta bin den medio di un impasse entre AVP y FUTURO. Mientras Prome Minister Mike Eman ta considera aumento di salario minimo un compromiso fundamental cu trahadonan, FUTURO ta insisti cu e medida mester wordo acompaña pa estudio economico y medidanan pa evita consecuencia negativo.

DIALOGO NA ARUBA TA PRIORIDAD

Croes a cuestiona e declaracionnan publico di Eman, cu segun e, ta duna impresion cu no tin mas espacio pa negociacion. "Dialogo na Hulanda ta importante, pero dialogo na Aruba ta mas importante", e minister a enfatisa. Segun Croes, e gremionan empresarial a manda un carta na Minister Geoffrey Wever, expresando nan disposicion pa reanuda negociacionnan. Sinembargo, el a aclara cu e mes ainda no tabata dispone di e documento. "Nos kier bolbe na mesa y tuma un decision responsabel pa futuro di nos pais", Croes a declara.

PRESUPUESTO 2027 AINDA NO TA PREPARA

Un di e preocupacionnan principal ta e impacto financiero riba institucionnan subsidia. Croes a menciona cu aproximadamente 60 trahado di hospital por wordo afecta pa e aumento, mientras e gastonan adicional no ta incorpora den presupuesto di 2027. Tambe el a cuestiona con e aumento salarial lo afecta famianan cu ta ricibi subsidio di huur. Si nan entrada subi, nan por eventualmente perde derecho riba determinado beneficio. E minister a adverti cu negoshinan chikito por enfrenta presion pa aumenta otro salarionan, adapta prijsnan of reduci personal. Pa limita e riesgonan aki, FUTURO ta considera opcionnan manera subsidio pa huur y energia. "Nos kier un aumento, pero e aumento no mester haci Aruba mas caro", Croes a enfatisa.

PAKICO TANTO PRESION DI TEMPO?

Croes a cuestiona e urgencia cu cu Eman kier implementa e medida, mientras diferente aspecto financiero ainda ta pendiente. Segun e minister, FUTURO a duna Prome Minister confianza pa dirigi e proceso di dialogo social y no por imagina cu AVP awor no kier duna espacio pa sigui negocia.

TENSION AUMENTA

E tension a aumenta despues cu e reunion extraordinario solicita pa FUTURO diadomingo anochi no a tuma luga. Aunke e bishita di Croes na Gobernador a hala atencion, no tin confirmacion di un renuncia of ruptura formal di coalicion. Pa awor, AVP ta mantene su compromiso cu e aumento salarial, mientras FUTURO ta exigi mas preparacion y consulta. E pregunta ta si e dos partido por logra un acuerdo sin pone continuidad di Gobierno na peliger.