Aruba ta despedi di abogado respeta Jeannot de Cuba: un bida dedica na husticia y servicio na su pais

ORANJESTAD — Mundo hudicial di Aruba ta den luto pa fayecimento di conocido y respeta abogado mr. Jean Maurice (Jeannot) de Cuba, kende a perde su bataya contra cancer y a bay sosega diahuebs. Cu su fayecimento, Aruba ta perde un profesional cu durante mas di 30 aña a dedica su bida na abogacia, husticia y servicio na comunidad. Jeannot de Cuba no tabata solamente un abogado cu un trayectoria extenso, sino tambe un profesional cu a ocupa diferente posicion di responsabilidad y liderazgo, incluyendo e di Deken di Orden di Abogado di Aruba.

UN TRAYECTORIA DI MAS DI 30 AÑA

Jeannot de Cuba a gradua na Universidad di Leiden, Hulanda, na 1994, obteniendo su titulo di derecho civil Hulandes. E mesun aña el a cuminsa eherce abogacia, un profesion cu lo a marca su bida pa mas di tres decada. Durante su carrera, el a traha como abogado na Amsterdam, Corsou y Aruba, acumulando un experiencia amplio den derecho civil, comercial y empresarial. El a representa tanto clientenan local como internacional, incluyendo institucionnan financiero, autoridadnan gubernamental, empresanan y inversionistanan.

SPECIALISACION

Su specialisacion tabata particularmente den asunto di bancarota, reorganisacion financiero, administracion di herencia y litigacion comercial. E tabata wordo nombra regularmente pa Corte como curator of administrador den casonan complica, incluyendo proceduranan cu tabata involucra diferente pais. 

DEKEN DI ORDEN DI ABOGADO

Un di e puntonan importante den su carrera tabata su contribucion na organisacion profesional di abogadonan na Aruba. De Cuba a ocupa e posicion di Vice-Deken entre 2009 y 2011, Tesorero entre 2014 y 2016, y finalmente Deken di Orden di Abogado di Aruba entre 2016 y 2018. Den e posicion aki, el a representa e profesion y participa na liderazgo di un institucion cu tin un papel esencial den defensa di independencia di abogacia y bon funcionamento di husticia. 

SU CONTRIBUCION A BAY MAS LEU CU SALA DI CORTE

Jeannot de Cuba su compromiso profesional no tabata limita na representa clientenan den tribunal. Entre 2008 y 2012, el a sirbi como presidente di Raad van Toezicht di Algemeen Pensioenfonds Aruba (APFA), e fondo di pension di funcionarionan publico. Tambe el a participa den comisionnan gubernamental encarga pa conseha tocante legislacion civil y empresarial, y den investigacionnan relaciona cu calidad di gobernacion y aplicacion di ley na Aruba.

ATIA

Entre 2016 y 2019, el a forma parti di directiva di Aruba Trade & Industry Association (ATIA), caminda tambe el a ocupa e posicion di presidente.

E trayectoria aki ta ilustra cu su conocemento juridico tabata wordo aplica no solamente na beneficio di su clientenan, sino tambe den diferente area di desaroyo institucional di pais. 

RECONOCEMENTO INTERNACIONAL

Su capacidad profesional tambe a haya reconocemento internacional. E prestigioso guia huridico Chambers and Partners a inclui Jeannot de Cuba entre e abogadonan distingui na Aruba den categoria di General Business Law. E publicacion ta describie como un abogado respeta cu experiencia considerable den transaccionnan empresarial y casonan di bancarota y insolvencia Como un di e profesionalnan relaciona cu oficina De Cuba Ormel Noordhuizen, su nomber a keda liga na un practica juridico cu a atende asuntonan tanto local como internacional. 

UN LEGADO CU TA KEDA

Tras di cada profesion exitoso tin un historia humano. Den caso di Jeannot de Cuba, esaki ta un historia di perseverancia, estudio, responsabilidad y añanan largo dedica na un profesion cu ta exigi conocemento, disciplina y compromiso. Di su prome pasonan den abogacia na 1994 te su periodo como Deken, De Cuba a construi un trayectoria cu ta refleha e importancia di experiencia y preparacion den mundo juridico. Su trabou como abogado, consehero, curator y miembro di diferente organismo importante ta forma parti di e legado profesional cu e ta laga atras. Pero ningun trayectoria, por mas grandi cu e ta, por kita e dolor di un despedida.

Despues di su bataya contra cancer, Jeannot de Cuba a cera su wowonan pa semper. E casonan cu el a defende, e responsabilidadnan cu el a carga y e contribucionnan cu el a haci na Aruba ta keda como testimonio di un bida profesional cu a abarca mas di tres decada. Awor, mas cu e titulonan y funcionnan cu el a ocupa, ta e ser humano Jeannot cu su sernan stima mester despedi di dje.

SU FAMIA

Jeannot de Cuba ta laga atras su casa stima Mireille, y nan tres yiu muher, pa ken su fayecimento ta un perdida profundamente personal. Noticiacla ta expresa su condolencianan mas sincero na Mireille, nan tres yiunan, famianan De Cuba y Saleh, coleganan di profesion y tur esnan cu a conoce y aprecia Jeannot durante su bida. Jeannot de Cuba a bay sosega, pero su nomber y su contribucion na abogacia Arubiano lo keda forma parti di historia juridico di nos pais.