MEP ta exigi accion contra overtourism na Aruba

ORANJESTAD — Lider di fraccion di MEP, Evelyn Wever-Croes, ta critica falta di accion di Gobierno y Parlamento pa controla crecemento di turismo y e impacto di overtourism riba calidad di bida di habitantenan di Aruba. Segun Wever-Croes, Aruba Tourism Authority (ATA) a expresa tambe preocupacion tocante e volumen creciente di turista y ta favorece stabilisacion cu solamente espacio limita pa mas crecemento. Sinembargo, no tur organisacion den sector turistico ta comparti e vision aki.

MEP ta insisti pa Parlamento amplia e dialogo cu Aruba Airport Authority (AAA) y Aruba Ports Authority (APA), pero e reunionnan solicita ainda no a wordo convoca. "Nos no por sigui papia di crecemento sin puntra cuanto mas nos isla por carga", Wever-Croes a declara.

MEP ta pidi un vision cla y medidanan concreto pa desaroya turismo di mas valor y menos impacto negativo, sin sacrifica bienestar di pueblo Arubiano.