Parlamentario di MEP Dangui Oduber: Stop riba vacation rentals ta favorece inversionistanan grandi

ORANJESTAD — Parlamentario di MEP, Dangui Oduber, ta critica e maneho nobo di Gobierno AVP-FUTURO pa vacation rentals, cu ta inclui un stop riba desaroyo nobo, mientras operadornan existente por registra y legalisa nan actividadnan.

Segun Oduber, e medida por favorece inversionistanan grandi cu ya tin hopi propiedad, mientras ta limita oportunidadnan di Arubianonan cu kier inverti den dos of tres apartamento.

E parlamentario ta exigi di Minister Geoffrey Wever e base legal, estudionan economico y claridad pa personanan cu ya a inverti den tereno of tin compromiso bancario.

Oduber ta enfatisa cu regulacion ta necesario, pero no mester crea privilegio pa inversionistanan grandi ni limita oportunidadnan di inversion local. E ta cuestiona tambe si e stop realmente lo contribui na mas vivienda pagabel.