Gobierno cu maneho nobo! Tur vacation rentals mester registra!

ORANJESTAD — Conseho di Minister a aproba un plan pa registra y regula vacation rentals na Aruba. Tur acomodacion existente mester registra, incluso esnan cu tin permiso caba. E periodo di registracion lo dura tres luna; e fechanan lo wordo anuncia despues.

Acomodacionnan cu tabata opera prome cu 1 di november 2026 y cu registra lo wordo evalua como uzo existente. E fecha aki no ta e inicio di registracion. Proyectonan cu ainda no ta opera por califica pa un areglo di transicion si por demostra obligacionnan concreto asumi prome cu e fecha, manera contrato di construccion of financiamento.

Registracion no ta duna permiso automatico, ni derecho pa amplia. Gobierno ta bisa cu lo respeta derechonan existente. Acomodacionnan cu no registra ta keda pafo di e areglo y no lo wordo considera pa legalisacion.

E evaluacion ta distingui tres categoria: berde, pa centronan y zonanan turistico, caminda legalisacion por ta posibel bou di condicionnan; geel, pa zonanan residencial y di transformacion, cu evaluacion individual; y cora, pa naturaleza y otro zonanan cu funcion specifico, caminda no lo tin legalisacion general.

Lo evalua cantidad di unidadnan y huespednan, seguridad contra candela, parkeo, accesibilidad, molester, awa sushi y proteccion di naturaleza y patrimonio. Un maneho temporal di tolerancia ainda mester pasa evaluacion juridico y aprobacion, y no lo permiti acomodacionnan nobo ni ampliacion.

Gobierno lo acepta tambe registracion di plannan nobo den centro di Oranjestad y San Nicolas, caminda e ROPV actual ta permiti un maximo combina di 100 unidad. Registracion no ta aprobacion. Proyectonan nobo pafo di e dos centronan no ta cay bou di e areglo aki.

Un taskforce lo anuncia e proceso digital y documentonan necesario. Cambionan den e plannan di ordenacion territorial lo pasa pa consulta publico prome cu decision final.