Aruba Conservation Foundation ta pidi pausa di construccion cerca di naturaleza sensitivo

ORANJESTAD — Aruba Conservation Foundation (ACF) ta pidi Gobierno pa para trabounan di construccion cerca di rooinan y areanan natural sensitivo te ora expertonan a evalua e medidanan di proteccion ambiental y esakinan ta na vigor.

E fundacion a presenta obhecionnan formal tocante Burubundu Residences cerca di Spaans Lagoen, Wanglo Condominiums cerca di Saliña Malmok y e proyecto hotelero di Iberosol na Arashi. Segun ACF, e desaroyonan por afecta fluho natural di awa, causa contaminacion y erosion, y fragmenta habitatnan.

ACF ta pidi claridad tocante permisonan, evaluacionnan independiente di impacto ambiental y proteccion di flora y fauna. E ta reconoce e necesidad pa mas vivienda, pero ta insisti cu desaroyo mester respeta naturaleza y planificacion teritorial.

E fundacion tambe ta propone zonanan di buffer ecologico, leynan ambiental mas completo y identificacion publico di areanan ecologico importante. Director di Conservacion Natasha Silva ta enfatisa cu proteccion mester cubri ecosistemanan completo y nan conexionnan, cu planificacion responsabel for di cuminsamento.