Prijs di gasolin ta aumenta drasticamente y ta pasa Afl. 3 pa liter

ORANJESTAD — Prijs di combustibel na Aruba ta subi atrobe entrante 14 di october. Gasolin unleaded-premium ta aumenta cu 20,6 cen pa Afl. 3,124 pa liter, mientras diesel ta yega Afl. 3,376 y kerosin Afl. 3,119.

Gasolin ta subi di 291,8 pa 312,4 cen pa liter, un aumento di aproximadamente 7,1%. Pa un tanki di 50 liter, esey ta significa Afl. 10,30 adicional: di Afl. 145,90 pa Afl. 156,20.

SUBIDA TA ACUMULA DESDE JULI

Segun actualisacionnan anterior di Noticiacla, gasolin tabata 265,8 cen pa liter na juli y a subi pa 290,9 cen na augustus. Cu e prijs di october, gasolin ta 17,5% mas caro cu na juli. Un tanki di 50 liter ta costa Afl. 23,30 mas cu e tempo ey. 

Diesel ta aumenta cu 27,6 cen pa liter, aproximadamente 8,9%, mientras kerosin ta registra e subida mas grandi: 36,3 cen, of cerca di 13,2%. Cumpra 50 liter di diesel lo costa Afl. 13,80 mas; pa kerosin, e diferencia ta Afl. 18,15.

E prijsnan anuncia pa Ministerio di Finansa, Asunto Economico y Sector Primario ta inclui BBO, BAZV y BAVP. E comunicado no ta splica e motibo di e aumentonan.