Dos homber herida den tiramento na San Nicolas

SAN NICOLAS — Dos homber di 18 y 27 aña a resulta herida cu bala den un tiramento na Caya St. Maarten, cerca di e cancha di basketball, diamars madruga pa mas o menos 1:30 na San Nicolas.

Polis cu a yega na e sitio no a haya hende, pero a haya huls y sanger. Poco despues, e dos victimanan a presenta na IMSAN. Nan a wordo transporta pa hospital bao guia di polis y, despues di tratamento medico, nan por a bay cas.

Recherche y polis tecnico a investiga e sitio y a confisca hulsnan y un celular. Tambe a confisca un brommer sin plachi di number, cu polis ta sospecha por a wordo horta pa joyriding. No a confirma si e brommer tin relacion cu e tiramento.

Polis ta pidi esnan cu a mira of sa algo pa yama e tiplijn 11141. Informacion por wordo comparti anonimamente.