Tevreden (MEP): Debate di AIOF ta mustra division den coalicion

ORANJESTAD — Parlamentario di MEP Hendrik Tevreden ta considera cu e debate tocante Fondo General di Inversion y Desaroyo (AIOF) a mustra division den coalicion y a laga preguntanan sin contesta tocante prioridad, transparencia y control di placa publico. E presupuesto a keda aproba cu 11 voto pro y 7 contra.

Tevreden ta señala cu parlamentario di AVP Mike de Meza a sostene un mocion di MEP pa exigi informacion y prueba di pago di e vuelo priva di Minister Gerlien Croes den dos siman. E mocion no a pasa. De Meza despues a bandona sala y no a participa den e votacion final di presupuesto.

Segun Tevreden, MEP no ta contra inversion, pero ta exigi criterio cla pa selecciona proyectonan y midi resultado. E ta afirma cu siete di e ocho proyectonan no a pasa pa evaluacion di un comision y ta referi na preocupacionnan di Raad van Advies y conseho di Algemene Rekenkamer Aruba pa mas transparencia.

Pa Tevreden, aprobacion di e fondo no ta kita responsabilidad di Gobierno pa splica su decisionnan y duna cuenta na Parlamento.