Mas di 120 organisacion invita pa forma maneho di hubentud 2027–2037

ORANJESTAD — Ministerio di Hubentud, bou di liderato di Minister Gerlien Croes, a invita mas di 120 organisacion pa contribui na e Maneho Integral di Hubentud Aruba 2027–2037. E rondanan di consulta ta tuma luga entre 27 di augustus y 29 di october 2026.

E consultanan ta enfoca riba salud mental, seguridad, educacion, igualdad di oportunidad, abandono escolar, uzo di substancia y sosten pa famianan. Representantenan di diferente sector ta comparti experiencia y propone prioridadnan y accionnan concreto.

Segun Croes, bienestar di mucha y hoben ta un responsabilidad comparti cu ta exigi colaboracion entre Gobierno y comunidad. E documento inicial ainda no ta un maneho definitivo; e aportacionnan lo sirbi pa defini metanan y pasonan di implementacion pa e proximo dies aña.

Organisacionnan invita por confirma participacion via jeugd.minkojis@arubagovernment.aw.