Oduber ta exigi igual proteccion huridico pa politiconan di Aruba

ORANJESTAD — Ex minister Otmar Oduber ta reclama garantianan huridico ekivalente na esunnan di politiconan na Hulanda y ta pidi Parlamento di Aruba pa exigi accion di gobierno. Den un manifesto, entrega na Parlamento, e ta insisti cu su peticion no ta busca impunidad: “Mi no ta pidi privilegio. Mi ta pidi igualdad”, segun traduccion di su texto.

E manifesto ta bini den contexto di e caso Flamingo y su decision pa bai den casacion na Hoge Raad. Su defensa a expresa apoyo pa e paso aki, alegando falta den evaluacion di prueba y motivacion di e sentencia di Hof.

Ta resalta cu Oduber a redacta e manifesto na Hulandes, en bes di Papiamento*, mientras e ta reclama igualdad cu Hulanda. Sin embargo, e documento ta formalmente dirigi na Parlamento, gobierno y pueblo di Aruba, no directamente na gobierno Hulandes. E ta pidi pa hiba e asunto na nivel di Reino.

Su preocupacion principal ta e base pa inicia investigacion penal contra un mandatario politico. E ta adverti contra investigacionnan cu ta busca un delito sin un base suficientemente concreto di antemano. “Prome un base suficientemente obhetivo, despues un investigacion”, e ta sostene.

Oduber ta afirma cu Parlamento a aproba cambionan den Landsverordening instelling ministeries (LIM) pa mehora proteccion huridico di mandatarionan. E ta exigi claridad tocante pakico, segun e, esakinan no a wordo implementa completamente. Tambe e ta pidi un estudio constitucional-huridico independiente pa compara e proteccion na Aruba y Hulanda.

E ex minister ta bisa cu no ta ataca Ministerio Publico y cu corrupcion mester wordo investiga. Su reclamo ta pa tin limite y control riba poder estatal. “Nos no ta pidi proteccion contra ley. Nos ta pidi proteccion door di ley”, e ta declara. E manifesto ta presenta su posicion; e no ta establece cu arbitrariedad a tuma lugar den su caso.