Autoridad di aviacion di Corsou a rechasa vuelo di Machado “riba peticion di mas halto

WILLEMSTAD — Segun e medio Curaçao.nu, autoridad di aviacion di Corsou, CCAA, a rechasa siman pasa e permiso di aterrizahe pa e avion priva cu lider oposicionista Venezolano María Corina Machado tabata kier a uza pa biaha for di Panama pa Corsou. Director general di CCAA, Peter Steinmetz, a confirma cu e peticion pa e avion HP-4DMB a wordo rechasa “riba base di un peticion di mas halto”. Ken exactamente a haci e peticion ey, ainda no ta cla.

Curaçao.nu a reporta anteriormente, basa riba agencia EFE, cu Corsou, Aruba y Boneiro no a duna permiso pa e vuelo cu Machado tabata spera uza pa sigui despues pa Venezuela. E team di Machado a confirma cu e avion finalmente no a sali for di Panama.

Despues di pregunta adicional di Curaçao.nu, Steinmetz a confirma directamente cu CCAA a ricibi un peticion pa “landing authorization” y cu esaki a wordo rechasa. Ministro di Trafico di Corsou, Charles Cooper, a bisa cu e peticion no a bin di su parti. Premier Gilmar Pisas, pa su banda, no a kier comenta riba ken a duna e instruccion.

E caso ta laga habri e pregunta si e decision a wordo tuma na Corsou mes of na nivel di Reino Hulandes. Relacionnan exterior ta un asunto di Reino, mientras Corsou y Aruba tin nan propio responsabilidad pa aviacion civil y permiso di aterrizahe.

Premier Hulandes Rob Jetten tampoco a exclui un posible rol Hulandes. Ora nan a puntra dje explicitamente si Hulanda a dificulta e biahe via Aruba of Corsou, e no a kier duna mas aclaracion y a referi na cooperacion cu oposicion Venezolano y seguridad di miembronan di oposicion. Ministerio di Asunto Exterior Hulandes tampoco a duna un splicacion concreto.

Segun e relato, vocero di Gabinete di Aruba na Den Haag, Sidney Kock, a indica cu aunke Aruba ta responsabel pa su propio aviacion, den caso di un figura politico manera Machado tambe ta drenta asunto di relacion exterior, caminda e islanan no ta dicidi completamente independientemente.