Famia di Kimberly kier sa ken a maneha e UTV durante accidente fatal na Aruba

ORANJESTAD — Famia di Kimberly, e muhe di 23 aña cu a perde su bida den un accidente cu UTV na Aruba dia 13 di september, ta busca testigonan pa aclara e circunstancianan di e tragedia, particularmente ken tabata na stuur. Segun un articulo di Erandi Godinez, publica dia 23 di september y basa riba declaracionnan na diario hulandes AD, e famia tin duda cu Kimberly tabata maneha.

Kimberly tabata na Aruba cu su novio, prome cu nan lo sigui biahe pa New York. Den e vehiculo tabatin tambe un amigo di su novio, un militar cu ta biba na Aruba. E UTV a bolter y Kimberly a fayese na e sitio.

Su prima Stephanie a conta AD cu Kimberly tabata cauteloso y cu maneha auto tabata causa ansiedad serca dje. P’esey e famia kier confirmacion independiente di e version cu e tabata na stuur. Nan ta enfatisa cu nan no ta busca un persona pa culpa, sino claridad tocante loke a pasa.

E famia a publica un yamada pa testigo riba medio social y ta ricibi asistencia di abogado Peter Schouten. Segun nan, un testigo a declara cu un homber tabata maneha aproximadamente 15 minuut prome cu e accidente. E declaracion ey, sin embargo, no ta establece ken tabata maneha na momento di e accidente.

Koninklijke Marechaussee a confirma cu e ta investiga e circunstancianan di e accidente, debi na participacion di un militar. E servicio ta den contacto cu e famia y ta pidi testigonan pa presenta nan informacion tambe na investigadornan.