IDEA ta prepara comerciante pa maneha finansas y seguro di empleado

ORANJESTAD — Comerciante existente y futuro comerciante na Aruba por amplia nan conocemento di maneho financiero y seguro di empleado durante e workshop “Ready to Grow”, cu IDEA ta organisa diamars 29 di september, di 9:00 di mainta pa 12:00 di merdia na Cas Veneranda.

E actividad ta e prome workshop di Fase 3 di Masterclass Entrepreneurship di DEZHI, bou di e tema “Manage Your Business”. E meta ta yuda participante tuma decision financiero mas informa y compronde nan responsabilidadnan como empleador.

Edward Erasmus, di Erasmus Consulting & Training, lo trata maneho financiero, mientras Cristian Garcia di SVb lo splica loke empleadornan mester sa tocante seguro di empleado. Lo tin tambe espacio pa pregunta y discusion.

Minister di Finansa, Asunto Economico y Sector Primario, Geoffrey Wever, a enfatisa cu un bon idea so no ta suficiente pa construi un negoshi sostenibel. Segun e minister, inverti den conocemento di comerciante ta contribui na un sector priva mas fuerte y empleo mas sostenibel.

Cupo ta limita. Esnan interesa por registra via e pagina oficial di e evento.