Piscadonan ta exigi aceso bek na costa pa sigui cu nan ofishi

ORANJESTAD — Un grupo di piscadonan a manda un carta urgente na Prome Minister Mike Eman pa reclama aceso bek na costa, despues cu cierre di diferente entrada na costa noord a dificulta nan trabou tradicional.

Segun e carta, piscadonan cu pa decadanan ta pisca for di baranca y costa awor no por yega cu pickup of jeep pa transporta anzue, palo, ijs y otro material necesario. Nan ta considera e situacion preocupante, pasobra e aceso a wordo limita sin consulta previo ni alternativa.

E piscadonan ta pidi Gobierno pa permiti, den e tempo mas cortico posibel, acceso provisional pa nan por sigui ejerce nan ofishi. Nan ta pidi tambe cu Gobierno tene cuenta cu derecho tradicional di piscadonan den e asunto di cierre di camindanan na costa noord.

Ademas, nan kier wordo inclui den cualkier decision futuro cu por afecta aceso na costa. E carta ta pidi un contesta antes di 10 di september, relaciona cu e proceso hudicial tocante acceso y proteccion di costa noord.