Otmar Oduber(PPA): Aruba su problema ta falta di desaroyo, no demasiado turismo

ORANJESTAD — Ex minister y ex lider di fraccion di PPA, Otmar Oduber, ta rechasa e idea cu Aruba su problema principal ta over-tourism. Segun  e, turismo a crece, pero Gobierno no a laga infrastructura, transporte publico, proteccion di naturaleza y planificacion crece den e mesun ritmo.

“Mi no ta kere cu nos tin over-tourism. Nos tin under-development,” Oduber a declara. Segun e, Gobierno tabata sa pa hopi aña cu turismo lo sigui crece y mester tabata prepara careteranan, transporte publico, regulacion y infrastructura na tempo.

Oduber a bisa cu Aruba no mester escoge entre desaroyo y proteccion di naturaleza. Cu bon regulacion, ruta, control y planificacion, ambos por existi hunto.

El a critica tambe e hecho cu placa genera pa turismo no ta wordo reinverti suficientemente den e infrastructura cu ta sostene e sector. Su conclusion ta cu turismo no a crece demasiado, sino cu Aruba no a desaroya suficiente pa carga e crecemento cu pais mes a crea.