Na Corsou OM ta exigi 40 luna efectivo contra Jonathan Schoop pa arma ilegal

WILLEMSTAD – Ministerio Publico (OM) na Corsou a exigi 48 luna di prizon contra e beisbolista profesional Jonathan Schoop, di cual ocho luna ta condicional. Si hues sigui e exigencia di Fiscal, Schoop lo mester cumpli 40 luna efectivo pa posesion di un arma di fuego pisa y municion.

E caso ta parti di investigacion Tijger, cu segun OM a cuminsa despues di informacion cu Schoop y otro personanan posiblemente tabata circula cu arma di fuego. Durante investigacion, autoridad a haya un arma pisa den auto di Schoop y, segun Fiscalia, DNA di Schoop a wordo haya riba e arma.

Co-sospechoso Giviene Basilia a declara cu e arma tabata di dje, pero OM no ta considera e declaracion creibel y tampoco a pidi castigo contra Basilia.

Fiscalia a conecta e caso tambe cu e contexto di violencia entre gruponan na Corsou y a bisa cu Schoop tin un rol prominente den Sta. Maria City, cu segun husticia tin conflicto cu Buena Vista City. E supuesto afiliacion aki, sinembargo, no a wordo determina pa hues.

OM ta considera un castigo fuerte necesario pa manda un señal contra posesion ilegal di arma na Corsou. Hues lo duna sentencia riba un fecha mas despues.