Respaldo y Mama Ties ta prepara clinica nobo pa salud mental

ORANJESTAD – Fundacion Salud Mental Aruba Respaldo y Fundacion Mama Ties a uni forsa pa prepara construccion di un clinica nobo y moderno pa cuido di salud mental na Aruba.

E infrastructura actual di Respaldo, situa banda di Hospital, tin casi 40 aña y ya no ta suficientemente adapta pa atende e demanda creciente y desaroyonan moderno den salud mental. Ademas, Respaldo actualmente ta brinda servicio for di dos localidad diferente.

E meta ta pa construi un edificio moderno, funcional y ekipa cu tecnologia avansa, unda eventualmente diferente servicionan di Respaldo por wordo reuni bou di un solo dak. Esaki mester mehora colaboracion, eficiencia y calidad di cuido pa cliente.

Como parti di preparacion, compania Hulandes TwynstraGudde ta trahando riba un Programma van Eisen, cu lo determina e rekisitonan funcional, tecnico y organisatorio di e edificio. Durante un bishita na Aruba entre 5 y 12 di augustus, e compania a consulta cu Respaldo y diferente stakeholder pa incorpora nan necesidadnan den e proyecto.

Mientrastanto, DIP ta atendiendo e proceso pa otorgamento di e tereno necesario pa realisa e clinica. Respaldo a gradici Fundacion Mama Ties pa su sosten y compromiso cu un proyecto cu mester fortalece cuido di salud mental na Aruba pa futuro.