Dowers ta controla progreso di renobacion na KIA, Scol di Polis y DIMAS

ORANJESTAD – Minister di Husticia, Integracion, Transporte Publico y Energia, Arthur Dowers, a realisa bishitanan espontaneo na KIA, Scol di Polis y futuro dependance di DIMAS na San Nicolas pa controla personalmente progreso di trabounan di renobacion.

Segun Dowers, seguimiento di proyecto no mester limita na informe y reunion. E kier constata riba tereno unda trabou ta avansa, unda tin atraso y cua obstaculo mester wordo atende pa evita tardansa innecesario.

Na KIA, e minister ta pone atencion particular na condicion di infrastructura, cu ta rekeri inversion tanto pa mehora situacion di presonan como condicionnan di trabou di personal.

Na Politie Opleidinginstituut Edgar Joaquin (Watty) Vos, trabou ta sigui pa rehabilita y amplia facilidadnan di formacion policial. Dowers tambe a bishita e edificio na San Nicolas cu lo bira dependance di DIMAS pa verifica progreso y puntonan pendiente.

E minister ta indica cu su prioridad ta pa proyectonan no solamente wordo anuncia of inicia, sino cu nan sigui avansa te nan finalisacion, cu e meta di crea facilidadnan mas digno, miho condicionnan di trabou y un servicio publico cu por funciona adecuadamente.