Herdé kier modernisa Gobierno y acelera proceduranan

ORANJESTAD – Minister di Vivienda, Infrastructura, Servicio Interno y Telecomunicacion, Rene Herdé, ta enfoca riba modernisacion di aparato publico, aceleracion di proceduranan y servicio mas accesibel pa ciudadano y empresario.

Desde cu el a asumi e ministerio, Herdé ta revisa funcionamento di diferente departamento pa identifica proceduranan cu ta tarda demasiado, obstaculonan administrativo y sistemanan cu no ta responde suficientemente rapido na demanda existente.

Segun e minister, modernisacion no ta solamente digitalisa formulario, pero tambe revisa proceso, elimina paso innecesario, fortalece departamento y haci mas uzo di tecnologia, sin compromete exigencianan legal y administrativo.

E enfoke ta aplica na tur cartera bou di su responsabilidad. Den Vivienda, Gobierno kier facilita mas solucion pa famia; den Infrastructura, acelera preparacion y ehecucion di proyecto; den Servicio Interno, crea un aparato publico mas eficiente; y den Telecomunicacion, fortalece innovacion y conectividad.

Herdé ta indica cu algun mehoracion ya ta bira visibel, pero cu ainda tin hopi trabou pendiente. E meta final ta un cambio structural y duradero, cu proceduranan mas rapido, transparente y eficiente, y un Gobierno prepara pa atende tanto e demanda acumula como necesidadnan futuro di Aruba.