Vrolijk(MEP): Minister Croes ainda no entrega prueba di pago di jet priva

ORANJESTAD - Parlamentario Edgard Vrolijk ta critica Minister Gerlien Croes pa ainda no a entrega e pruebanan di pago relaciona cu su uzo di un jet priva, apesar di un conseho formal di Comision di LAR emiti dia 10 di juli 2026.

Segun Vrolijk, Croes inicialmente a declara cu e mes a paga e vuelo, pero despues a bisa cu el a comparti e gasto. Peticionnan di parlamentario pa haya prueba di pago no a haya contesta, tampoco un peticion via Ley di Openbaarheid van Bestuur (LOB).

Despues di esaki, Comision di LAR a conclui cu minister tin deber di entrega e informacion. Cuater siman despues, segun Vrolijk, e contesta ainda no a yega.

E parlamentario ta señala cu Gabinete AVP-Futuro mes a priminti den su acuerdo di gobernacion pa fortalece LAR y respeta su consehonan dentro di termino legal. Si minister no contesta dentro di e termino aplicabel, Vrolijk ta indica cu e parlamentarionan ta prepara pa acudi na Corte.

Segun Vrolijk, e asunto no ta trata solamente di transparencia, sino tambe di placa publico cu Gobierno por termina gastando na procedimientonan legal pa un informacion cu, segun  e, por a wordo entrega desde principio.