Norwegian Luna lo haci su prome bishita na Aruba den mei 2028

MIAMI - Norwegian Cruise Line (NCL) a anuncia su programa pa zomer 2028, cu mas cu 450 crucero riba 20 barco na Bahamas, Caribe y Europa. Pa Aruba, e noticia principal ta cu Norwegian Luna lo haci su prome bishita oficial na nos isla den mei 2028.

E barco lo opera un crucero \special di 10 dia for di Miami pa New York, como parti di su reposicionamento. Durante e ruta, Norwegian Luna lo haci su prome escala na Aruba, Corsou y San Juan, Puerto Rico.

E bishita ta agrega otro barco moderno di NCL na e oferta di crucero pa Aruba y por contribui na e fluho di bishitantenan di crucero durante un periodo cu tradicionalmente ta cay fuera di temporada di invierno mas fuerte.

NCL tambe ta amplia su oferta den Caribe. Norwegian Aura lo ofrece cruceronan di siete dia for di Miami pa Caribe Oriental, mientras Norwegian Prima lo opera for di Galveston pa Caribe Occidental. Norwegian Aqua, entretanto, lo concentra riba cruceronan cortico di tres y cuater anochi pa Bahamas.