Eclipse solar grandi awe na Europa; Aruba no lo por mir’e

AMSTERDAM -Awe, 12 di augustus 2026, un eclipse solar total lo pasa riba parti di Europa. Na Islandia, norte di Spaña y un parti chikito di Portugal, luna lo tapa solo completamente. Na Hulanda, e luna lo cubri alrededor di 88 pa 90% di e solo durante punto maximo di e eclipse, convirti’e den e eclipse solar mas impresionante aya desde 1999.

Na Hulanda e fenomeno ta cuminsa rond di 7:15 di anochi y yega su punto maximo poco despues di 8:10, poco prome cu solo baha.

ARUBA 

Pero pa Aruba e noticia ta diferente: e eclipse solar di awe no ta visibel for di Aruba. Datos astronomico pa Oranjestad no ta inclui e eclipse di 12 di augustus entre e eclipsenan visibel aki. E proximo eclipse cu por wordo mira for di Aruba ta un eclipse lunar parcial riba 27-28 di augustus 2026.

Esaki ta nifica cu Arubianonan no mester spera mira luna pasa dilanti di solo awe, ni un eclipse parcial significativo. Pa mira e eclipse total, nan lo mester sigui transmisionnan directo for di Europa.

Pa hende cu ta den Europa y kier observa e eclipse, experto ta adverti pa no mira directamente na solo, tampoco cu bril di solo regular, glas di solda of otro material improvisa. Mester usa solamente bril special pa eclipse cu ta cumpli cu norma ISO 12312-2.