Polis ta parti 107 boet durante control di trafico na Oranjestad

ORANJESTAD — Polis di districto di Oranjestad a parti un total di 107 boet durante un control di trafico cu a tuma luga diaranson 23 di september, for di atardi te anochi laat.

E control, cu tambe a conta cu participacion di Unidad Motorisa y departamento CEA, a enfoca principalmente riba velocidad halto, uzo di celular mientras ta stuur y otro infraccionnan den trafico.

Polis a haci control na diferente punto, entre otro riba Watty Vos Boulevard na altura di rotonde Bushiri y rotonde Cumana, y riba Henny Eman Boulevard na altura di ATA.

Ademas di e 107 boetnan, polis a detene dos persona pa falta di permiso di estadia y a tuma un auto cu no tabatin ningun documento valido.

E boetnan a wordo parti pa infraccionnan manera exceso di velocidad, uzo di celular, problema cu rijbewijs, no uza faha di seguridad, falta di pago di impuesto di plachi di number, falta di seguro, keuringskaart y luznan defectuoso.

Cuerpo Policial Aruba ta indica cu controlnan di trafico lo continua y ta haci un yamado na chauffeurnan pa mantene nan documentonan na ordo y valido.