Ministerio Publico a haya autorisacion pa persigui ex-minister Chris Romero

ORANJESTAD — Ministerio Publico (OM) a haya autorizacion di Corte Comun pa sigui cu persecucion penal contra ex-minister di Transporte, Comunicacion y Sector Primario Chris Romero den caso Kwihi. Den e dianan venidero OM lo saca citacionnan pa e seis sospechosonan den e caso, mientras Corte a determina tambe un fecha pa un audiencia pa e asina yama regie zitting.

Caso Kwihi ta relaciona cu sospechonan di apropiacion indebido di fondo publico, estafa, labamento di placa, fraude di belasting y maluso di funcion, presuntamente cometi entre november 2017 y october 2021.

E investigacion a bira publico na 2023 despues di huiszoekingnan na diferente adres y confiscacion di administracion y cargadornan di informacion. Informacion anterior di OM y publicacionnan local a identifica Romero como e ex-minister relaciona cu e acuerdonan di servicio cu ta forma parti di e investigacion.

Pa OM por persigui un mandatario pa un supuesto delito cometi durante ehercisio di su funcion, Codigo di Procedemento Penal ta exigi autorizacion previo di Corte Comun. E garantia aki, inclui den articulo 476, ta destina pa evita cu ley penal por wordo uza como instrumento di poder politico.

Riba 25 di augustus, Corte Comun a trata e peticion di OM y a duna autorizacion pa sigui cu e persecucion di Romero.

Den palabra simpel, esaki no ta significa cu Corte a declara Chris Romero culpabel. E decision solamente ta significa cu OM a cumpli cu e rekisito legal necesario pa por presenta e caso formalmente contra dje.

E citacion ta e documento oficial cu lo informa e sospechoso di e acusacionnan y e fecha cu e mester presenta dilanti Corte. E audiencia di regie ta principalmente pa organiza e proceso, trata peticionnan di defensa y OM y determina con e caso lo sigui.

Romero y e otro cinco personanan den e caso ta keda sospechoso y ta wordo considera inocente mientras nan culpabilidad no a wordo determina door di Corte.