Fraccion di AVP ta felicita Mike de Meza despues cu el a bira ministeriabel atrobe

ORANJESTAD – Fraccion di AVP a reacciona diamars anochi cu satisfaccion riba e noticia cu parlamentario Mike de Meza ta ministeriabel atrobe, despues di e acuerdo anuncia entre De Meza y Ministerio Publico relaciona cu su asunto fiscal.

Den un declaracion, fraccion AVP a felicita De Meza y su team y a destaca e manera cu, segun e partido, el a enfrenta un periodo dificil.

“Durante un periodo dificil, Mike a sigui para firme, cu serenidad, perseverancia y confianza,” fraccion AVP a declara.

E fraccion a describi De Meza como un politico cu experiencia y capacidad, y a enfatisa su compromiso cu Aruba, particularmente cu San Nicolas.

“Mike ta un politico cu experiencia, capacidad y un profundo amor pa Aruba. Su compromiso cu San Nicolas y cu henter nos pais semper tabata evidente,” segun e comunicado.

AVP tambe a dirigi un mensahe personal na su colega parlamentario: “Mikey, nos ta orguyoso di bo perseverancia. Y nos ta kere den bo!”

E reaccion ta sigui e anuncio haci mas trempan diamars, den cual De Meza y su cuerpo di abogado a informa cu el a yega na un acuerdo cu Ministerio Publico pa paga Afl. 2.500 como transaccion, sin admiti culpabilidad. Segun e explicacion presenta, e solucion di e caso ta elimina e obstaculo cu tabata impidi De Meza pa pasa e screening necesario pa un posible funcion ministerial.

Fraccion AVP a conclui su declaracion cu e mensahe: “Huntu nos ta sigui traha pa un Aruba mas fuerte.”