109 studiante a sali rumbo pa Hulanda cu apoyo di Arubalening

ORANJESTAD – Un total di 109 studiante Arubiano a subi diaranson riba un vuelo di KLM rumbo pa Hulanda, unda nan lo cuminsa un etapa nobo den nan bida academico. E grupo ta forma parti di 198 studiante cu a haya apoyo financiero di Gobierno di Aruba pa sigui estudio superior na Hulanda durante aña academico 2026-2027.

Segun Departamento di Enseñansa, despues di varios luna di preparacion, e grupo cu a biaha diaranson, ta representa e prome partida di e studiantenan cu a haya un Arubalening. E otro 89 beneficiario ya a biaha caba of lo haci esey den e dianan venidero.

Den e escogencia di ciudadnan, Den Haag ta e destino mas popular cu 36 studiante, sigui pa Rotterdam cu 19 y Leiden cu 17. Sinembargo, no tur studiante lo biba den mesun ciudad unda nan lo sigui nan estudio.

Loke ta trata estudionan, International Business ta e opcion mas popular cu 18 studiante. Tambe tin hopi interes den HBO-Rechten, mientras cu e sector di cuido ta sigui atrae studiantenan, cu ocho persona cu lo sigui e formacion pa verpleegkundige y cinco cu lo studia Geneeskunde.

Di e total di 198 beneficiario, 147 lo sigui un HBO-Bachelor, 41 un WO-Bachelor, un studiante un HBO-Master y 9 un WO-Master.

Departamento di Enseñansa y e seccion Arubalening a desea tur e studiantenan hopi exito den e etapa nobo, animando nan pa sigui cree den nan mes, busca ayudo ora ta necesario y haci bon uzo di e oportunidad cu nan a haya. NOTA; E potret ta di archivo di Noticiacla.com.