E grupo di studiantenan di Aruba a yega Hulanda bon

DEN HAAG – Cu vuelo KL 767 di KLM a yega awe 6 di Augustus e grupo di studiante Arubano pa sigi un estudio avansa na nivel di HBO of Universidad na Hulanda. Ta trata di un total di 114 studiante cu awe ta riba e vuelo for di Aruba. E total di studiantenan cu a aña aki a bin studia na Hulanda ta mas grandi, pasobra tin studiante cu ta na Hulanda caba of ta bin mas laat.

Na Schiphol e studiantenan mescos cu tur aña a wordo ricibi door di Minister Plenipotenciario Mildred Schwengle. Pa zorg cu tur cos cana bon un delegacion consistiendo di functionarionan di Departamento di Enseñansa, Bienestar General y Cultura di Arubahuis, studiementor y miembronan di e POC (Plaatselijke Opvangcommissie) tabata presente den sala di yegada di Schiphol.

Unabez cu e grupo di studiante a sali cu nan maleta nan mester a para den grupo pa warda nan turno pa bai na e bus cu lo hiba nan na nan ciudad.

Mientrastanto tabata tin un momento fotografico cu e studiantenan cu ta desea di haci esaki.

Mayan e grupo di studiantenan aki lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.

E prome aña e studiante ta ricibi guia di e studiementor, pero pa e resto di su estudio e ta cai bou di Gabinete di Aruba.

Riba Facebook di Gabinete di Aruba por mira e live stream di e yegada. Pa potretnan por check e website di Arubahuis y riba rednan social manera Facebook y Instagram.

E potretnan ta cortesia di Gabinete di Aruba